Шомуродов Бэйл билан бирга ўйнаши кутилмоқда!
- 10-июн 2022, 19:52
- Zohir Toshxo’jayev
- 2
- Футбол
Жозе Моуриньо келаси мавсум учун таркибни шакллантириш бўйича бош қотирмоқда. “Рома”дан кетадиганлар номи деярли аниқлаб бўлинган. Бош мураббий ишонч билдиришда давом этадиган футболч орасида Элдор Шомуродов ҳам бор. Моуриньо легионеримиз ўзини кўрсатиши учун яна бир мавсум имконият беришга қарор қилди.
Португалиялик мураббий ўз жамоасида кутаётган ўйинчилар сафи кенгайиб бораётганини ҳам таъкидлаш лозим. Моуриньо келаси мавсум олдидан Гарет Бэйлни Римга олиб келмоқчи. Уэльслик юлдузнинг “Реал” билан шартномаси тугади. Унинг терма жамоаси 2022 йилнинг охирида Қатарда бўладиган жаҳон чемпионатида қатнашади.
Бэйл мундиалгача юқори спорт формасини ушлаб туриш учун ўзига мунтазам ўйин амалиёти берадиган жамоага ўтишни хоҳлаяпти. Асосий харидорлар Англия томонлардан чиқмоқда.
Бироқ, Жозе Моуриньо уэльслик ҳужумчига “Рома” таркибидан жой беришга тайёр.
32 ёшли футболчи “Реал”га 2013 йили 100 миллион евро эвазига “Тоттенхэм”дан олиб келинган. Шундан бери Гарет мадридликлар сафида жами 258 та учрашувда майдонга тушиб, 106 та гол ва 67 та ассист муаллифи бўлди.
Гарет Бэйл ўнг қанот ҳужумкор футболчиси ҳисобланади. У Элдор Шомуродов каби ҳар икки қанот ва ҳужум марказида ҳам ўйнай олади.
“Милан” римликларни трансферга кўндирди
“Милан” раҳбарияти трансфер ҳуқуқи “Рома”га тегишли бўлган 31 ёшли ҳимоячи Алессандро Флоренцини тўлиқ ўз сафида олиб қоладиган бўлди.
Миланликларда Италия терма жамоаси ўйинчисининг ижара муддати тугаганидан кейин уни 4,5 миллион евро эвазига тўлиқ трансфер қилиш ҳуқуқи бор эди. Бироқ чемпион жамоа бу суммани пасайтиришга ҳаракат қилаётган эди.
Calciomercato.com сайтининг хабар беришича, Рим клуби мутасаддилари белгиланган нархдан чегирма қилишга розилик берган. Улар ўзларига керак бўлмай қолган ўйинчини Миланга жўнатиш учун 3-3,5 миллион евро миқдорида компенсация оладиган бўлди.
“Милан” бошида Флоренцини 2,5 миллион еврога сотиб олмоқчи эди. “Роа” спорт директори Тьягу Пинто бу суммага кўнмаганидан кейин миланликлар таклифни ўзгартирди.
Флоренци “Милан” чемпионлиги билан якунланган чемпионатда 24 та учрашувда қатнашиб, рақиблар дарвозасини икки марта ишғол қилди.
“Рома” ўйинчи алмашади
“Рома” спорт директори Тьягу Пинто бош мураббий Жозе Моуриньо талабига кўра, ҳимоя чизиғини кучайтириш учун “Лилль”дан Зеки Челикни олиб келмоқчи.
Француз клуби 25 ёшли футболчини қўйиб юборишга тайёр. Улар бу трансфер учун 9 миллион евро талаб қиляпти.
La Gazzetta dello Sport нашрининг хабар беришича, рим клуби мутасаддилари бу трансфер нархини тушириш учун шартномага Жордан Вернетуни қўшмоқчи. Жозе Моуриньо келаси мавсум франциялик футболчига ишонч билдирмоқчи эмас.
Сўнгги маълумотларга қараганда, “Лилль” ҳам бу рокировкага мойиллик билдирган. Энди тез кунларда ҳар икки томон мутасаддилари ўйинчи алмашиш бўйича музокараларни бошлайди.
Зеки Челикнинг ўзи Рим клуби билан шахсий шартнома бўйича келишиб олган. Унга кўра, ўнг қанот ҳимоячисига ҳар мавсум учун икки миллион евро тўланади.
Челик ўтган мавсумда барча турнирларда 40 та учрашув ўтказиб, учта гол ва учта ассист муаллифи бўлди.
