Шерзод Эсановнинг келгуси трансферидан "Олимпик" ва "Андижон" клублари улуш оладилар
- 22-декабр 2024, 01:03
- Shuhratbek Jo’rayev
- 0
- Футбол
ФИФА халқаро трансферлар тизимини соддалаштириш, ундаги маълумотлар шаффоф ва тўғри юритилиши масаласига катта эътибор қаратади. Ташкилот бу йўлда Matching System (TMS) va Clearing House тизимларини интеграциялашга эришди. Бунинг натижасида футболчининг электрон паспортини онлайн юритиб бориш орқали унинг келгуси трансферларидан футболчини тарбиялаган клубларнинг пул ишлаши соддалаштирилди.
Лига Россиянинг "Акрон" клуби аъзосига айланган Шерзод Эсановнинг электрон футболчи паспортига ўзида мавжуд маълумот ва ҳужжатлардан келиб чиқиб, унинг "Андижон" ва "Олимпик" клублари таркибида рўйхатдан ўтган даврларни киритди. ФИФА эса бу маълумотларни расман тасдиқлади. Эндиликда мазкур икки клуб Шерзод Эсановнинг келгуси трансферидан улуш олиш имкониятига эга бўлди.
Эсанов 12 ёшга тўлганидан бошлаб то биринчи меҳнат шартномасини имзолагунига қадар бўлган даври акс этган маълумотлар Лигада мавжуд эмас. Бу давр учун компенсация футболчининг маълум бир клубга қарашли академия ёки футбол мактабида таҳсил олганини исботловчи ФИФА расмий тилларидан бирида юритилган хужжат мавжуд бўлган ҳолдагина тўлаб берилади.
Шундан келиб чиқиб, Лига барча футбол клубларини бу каби хужжатларни юритишга эътиборли бўлишга чақиради. Эсановга тегишли бундай хужжат шу йилнинг 31 декабрь санасига қадар тақдим этилса, Лига Эсановнинг ФИФА саҳифасидаги маълумотларини тўлдириш устида иш олиб боради.
ЎзПФЛ матбуот хизмати.