Саидазамат Мирсаидов: "Мавсумнинг сўнгги баҳсини ижобий якунлашга ҳаракат қиламиз"

Ўзбекистон Суперлигасининг сўнгги, 30-туридан ўрин олган “Навбаҳор” – “Пахтакор” жамоалари ўртасидаги учрашув арафасида “лочинлар”нинг 24 ёшли маҳоратли ҳимоячиси Саидазамат Мирсаидов бўлажак ўйин ҳақидаги фикрлари билан ўртоқлашди. Бу ҳақида клуб матбуот хизмати маълум қилди.

- Жамоамиз жорий мавсумнинг охирги баҳсини “Пахтакор”га қарши ўтказади. Мазкур клублар принципиал рақиб бўлганлиги боис, турнир жадвалида қайси ўринда бўлишидан қатъий назар, ушбу жамоалар ўртасидаги ўйинлар доимо шиддатли ва кескин курашлар остида кечган ҳамда бу сафарги баҳс ҳам бундан мустасно бўлмайди, албатта. 

Бундан ташқари, тошкентликларда кумуш медални қўлга киритиш имконияти сақланиб қолганлиги учун ҳам бўлажак учрашувнинг томошабоп кечиши эҳтимоли юқори. 

Биз ҳам мазкур ўйинда майдонга ўзгача руҳ ва иштиёқда тушиб, ғалаба қозониб, мухлисларга қувонч улашиш, жорий мавсумнинг сўнгги баҳсини ижобий тарзда якунлашга ҳаракат қиламиз ҳамда буни амалга ошириш учун барча имкониятимизни ишга соламиз. 
Ишқибозлардан эса жамоамизни бевосита стадионда муносиб тарзда қўллаб-қувватлаб, ғалабамизга мададкор бўлишларини сўраб қоламан. 

Фурсатдан фойдаланиб, жорий мавсумда жамоамизга барча шароитларни яратиб берган Наманган вилояти ҳокими Шавкатжон Шокиржанович Абдураззоқов ва “Навбаҳор” клуби раҳбариятига футболчилар номидан ўз миннатдорчилигимни билдираман, - деди Саидазамат Мирсаидов.