Руни Англиянинг айни дамдаги энг яхши футболчиси кимлигини айтди

"Манчестер Юнайтед" ва Англия терма жамоаси собиқ ҳужумчиси Уэйн Руни ҳозирда кимни энг яхши инглиз футболчиси деб билишини айтди.

“Фил Фоден мен учун энг яхшиси. У бу мавсумда ҳали ўзининг энг яхши даражасини кўрсата олгани йўқ, лекин Фил ўз даражасини кўрсатса Англияда энг яхшиси. Беллингем ва Пальмерни эътироф этиш мумкин, аммо мен Фоденни танлаган бўлардим”, - деди Руни Talksport нашрига берган интервьюсида.

Эслатиб ўтамиз, Фил Фоден ўтган мавсум Англия Премьер-лигасининг энг яхши футболчиси деб топилган эди. 24 ёшли ярим ҳимоячи АПЛнинг жорий мавсумида тўртта учрашувда майдонга тушди. "Манчестер Сити" эса турнир жадвалида учинчи ўринда бормоқда.