Рўзиқул Бердиев: "Чемпионлик пойгасида охиригача қатнаша олмаганимизнинг бир қанча сабаблари бор..."

Ўзбекистон Суперлигаси 26-туридан ўрин олган ОКМК - "Насаф" баҳси бўлиб ўтди. Унда томонлар 1:1 ҳисобида дуранг ўйнади. 

Учрашувдан сўнг ташкил этилган матбуот анжуманида "аждарлар" бош мураббийи Рўзиқул Бердиев ўз фикрлари билан ўртоқлашди. 

"Хайрли кеч, ҳаммага. Бугунги ўйин жанговор тарзда ўтди. Икки хамоа ҳам ғалаба учун майдонга тушди. ОКМК ҳам, биз ҳам 3 очкога лойиқ учрашув намойиш этдик. Бизда ҳам кўп вазиятлар бўлди.

Водийдаги дербида ҳам дуранг натижа қайд этилибди. Кумуш медал учун муносиб эдик, деб ўйлайман. Бугун ҳам натижа учун ҳаракат қилгандик. Аммо қийин бўлиши аниқ эди.

Кўп баҳсларда ротация қилишга мажбурмиз. Сабаби, олдинда бизни муҳим беллашув кутмоқда. Шундай экан, таркибда йўқотиш бўлмаслиги учун асосий таркибда ўзгаришлар қилиб туришимиз лозим. Асосан марказ ва ҳужум чизиғида ротация қиламиз. Чунки шу позицияларда ўзгариш қилишга имконимиз бор.

Вице-чемпионлик, иккита кубок қўлга киритилиши - "Насаф" тарихида ҳали содир бўлмаган. Буни такрорлаш ҳам қийин бўлади. Шу туфайли, мен ишонч билан айта оламанки, бу мавсум биз учун энг яхшиси бўлди.

Чемпионлик пойгасида охиригача қатнаша олмаганимизнинг бир қанча сабаблари бор. Биринчидан, айрим муҳим ўйинчиларимизни йўқотдик. Яна баъзи легионерлар трансферида омадсизликка учрадик. Қолаверса, барқарорлик, маҳорат етишмаслиги каби ҳолатлар ҳам максимал ижобий натижа қайд этилмаганига сабаб бўлди.

Жорий мавсум "Насаф"га 5 баллик системада 5 баҳо қўя оламан. Негалигини юқорида айтиб ўтдим", - деди мутахассис.