Саудия Арабистони Профессионал лигасининг 10-туридан қолдирилган ўйин якунланди, унда “Ан-Нажма” ва “Ан-Наср” ўзаро тўқнаш келди. Учрашув Жидда шаҳрида бўлиб ўтди.
Ушбу баҳсда Криштиану Роналду етакчилигидаги “Ан-Наср” мезбонлар дарвозасига жавобсиз бешта тўп киритди.
Ўйиндаги ҳисобни айнан Роналду очди. Португалиялик юлдуз 7-дақиқада пенальтини аниқ амалга оширди. Қолган голлардан иккитасини Иньиго Мартинес, биттаданини Садио Мане ва Кингсли Коман киритди.
Бу учрашувда Роналду ўзининг рекордини яна янгилади. Жаҳон футболида энг кўп тўп киритган ҳужумчи умумий голлари сонини 965 тага етказди.
41 ёшли тўпурар ўзи кўзлаган минглик маррага тобора яқинлашиб келмоқда. Яна 35 та гол урган тақдирда Роналду футбол тарихида мингта гол урган биринчи футболчига айланади.