Роналду нега YouTube канал очганини изоҳлади

“Ан-Наср” клуби ва Португалия терма жамоаси ҳужумчиси Криштиану Роналду YouTube’да шахсий каналини очиш сабаблари ҳақида гапирди.

“Менда узоқ вақтдан бери канал яратиш ғояси бор эди, лекин ўтган йили мен уни ишга тушириш заруратини ҳис қилдим. Кейин стратегия ва ишни юритиш учун масъул бўлган жамоа тузилди.

YouTube менга бутун дунё бўйлаб миллионлаб мухлисларимни қамраб олишимга имкон беради. Бу канал менга сайёрамизнинг исталган нуқтасидаги энг ёш одамлар билан ҳам боғланиш имконини беради. Бу йўлда менга ҳамроҳ бўлган ва қўллаб-қувватлаган барчадан миннатдорман.

Мен ушбу канал орқали машғулотларимни, қарашларимни, нафақат футбол оламидаги, балки ундан ташқаридаги дўстларим билан ҳам суҳбатларимни кўрсатмоқчиман. Мен майдон ташқарисида содир бўлган кўплаб воқеаларни мухлисларим билан бўлишмоқчиман”, - дея Роналдунинг сўзларини келтиради Marca.

Таъкидлаш керакки, Роналдунинг YouTube канали бир неча кун ичида миллионлаб обуначиларни жамлай олди ва катта шов-шувларга сабаб бўлди.