“Рома” қаҳрамони бир зумда душманга айланди

“Рома” мутасаддилари 30 миллион евродан қуруқ қолганини ҳазм қила олмаяпти. Англия премьер-лигаси вакили “Борнмут” универсал футболчи Николо Дзаньоло учун айнан шунча ваъда қилганди.

Англияликлар 23 ёшли футболчига “Ром”дан сўраганидан кўп маош берилишини айтди. Бироқ, Николо келажагини ёзда ҳал қилиш қарорига келиб, бу жамоа таклифини расман рад қилганидан кейин “Рома” раҳбарияти ноқулай вазиятга тушиб қолди.

Агар Николо ёзда кетадиган бўлса, унинг шартномаси якуланишига бир йил қолган бўлади ва бу ўз-ўзидан унинг нархини пасайишига сабаб бўлади.

Ёзда Дзаньоло учун ҳозирги 30 миллион еврони таклиф қиладиган жамоа чиқиши ҳам муаммога айланади.

Энди Рим клуби хўжайинлари футболчига жазо чораларини қўлламоқчи.

Il Tempo нашрининг таъкидлашича, энди клуб футболчини мавсум охирига қадар жамоадан ажратиб қўйишни ўйлаяпти. Агар шу қарор амалга тадбиқ қилинса, истеълодли ўйинчи ёзгача ўйин амалиётисиз қолиб кетади.

Қизиғи, яқин-яқингача “Рома”нинг қаҳрамони сифатида ардоқлаган Николо Дзаньоло энди душманга айланиб қолди.