Англия Премьер-лигасида “Борнмут” клуби шарафини ҳимоя қилиб келаётган ҳимоячи Алекс Хименес яқин келажакда “Реал” сафида тўп тепишни орзу қилаётганини айтди.
- Ҳозир мен тўлиқ “Борнмут”га эътибор қаратганман. Лекин келажакда, албатта, Мадридга қайтиб, “Реал”да ўйнашни хоҳлайман. Бу менинг уйим, мен барчасини “Реал”да ўргандим, - деди Алекс Хименес Mundo Deportivo нашри журналистлари билан суҳбатда.
20 ёшли Хименес “Реал” тарбияланувчиси ҳисобланади. Бироқ асосий таркибга кира олмаган ва бирорта ўйин ўтказмаган футболчи 2024 йилда клубни тарк этди. Ўшанда “Милан” ўнг қанот ҳимоячиси учун 14 миллион евродан сал кўпроқ пул тўлаб, уни Италияга олиб кетганди.
“Борнмут” Хименесни ўтган ёзда ижарага таклиф қилди ва қишки трансферлар даврида уни ўз сафига тўлиқ қўшиб олди.