Равшан Эрматов "Андижон"нинг 60 йиллик юбилейи маросимида: "Андижон"ни ОЧЛда муносиб иштирок этиши ва узоққа боришини мақсад қилишимиз керак"

Бугун “Андижон” футбол клубининг 60 йиллик юбилей байрами. ЎФА биринчи вице-президенти Равшан Эрматов бошчилигидаги делегация Андижонга келди.

Дастлаб футбол академиясида бўлдилар. Сўнгра Андижон шаҳридаги “Ёшлар маркази”да мухлислар, футбол фахрийлари, футбол мутасаддилари, ёш футболчилар ва ОАВ вакиллари иштирокида учрашув бўлиб ўтди.  Унда Равшан Эрматовдан ташқари, Биродар Абдураимов, Тўлаган Исоқов, Азамат Абдураимов, Сервер Жепаров, Рахмиддин Зикрияев ва Мирзаҳаким Тўхтамирзаев иштирок этдилар.

Дастлаб ЎФА биринчи вице-президенти Равшан Эрматовга сўз берилди.

“Ассалому алайкум, ҳурматли азиз андижонликлар! Барчангизни кўриб турганимиздан хурсандмиз. Сизларни “Андижон” футбол клубини 60 ёшга тўлгани билан муборакбод этамиз. Ҳаммаси ўз-ўзидан бўлмайди. Катта меҳнат талаб қилинади ва буни самарасини кўриб турибмиз, етказганига шукр. Кўп йиллардан бери биламизки, Бахтиёр Ҳамидуллаев, Рустам Абдиев ва бошқаларни кўриб турибмиз. Булар “Андижон” футболини афсоналари. Ҳурматли Президентимизнинг қўллаб-қувватлашлари, ғамхўрликлари эвазига футболимизда шунча шарт-шароитлар яратиляпти. Натижалар ҳам шунга яраша бўлмоқда. “Андижон”ни биринчи марта Ўзбекистон Кубоги финалига чиқиб ва ўша финални ичига кириб кетадиган даражада ўйин кўрсатиб, ғалаба қозонгани – бу бутун Андижон ҳалқини ютуғи. Андижонда футбол ҳар доим бўлган. Энг муҳими, кейинги йили айнан Андижонда Осиё Чемпионлар лигаси ўйинлари ўтиши бутун Андижон учун катта байрам!

Бу йил биринчи марта юртимизда ФИФАнинг футзал бўйича жаҳон чемпионатини биргаликда муваффақиятли ўтказдик. Куни кеча Кореядан учиб келдим. У ерда ФИФА президенти Жанни Инфантино юқори минбардан туриб 211 давлат футболи раҳбарлари ўтирган залда Ўзбекистонни алоҳида эътироф этиб, ўз тарихида биринчи марта Ўзбекистон ФИФА мусобақасини ташкил қилганига қарамаслан уни энг юқори савияда ва назаримда энг яхшисини ташкил қилди, дея жуда илиқ сўзларни айтди. Айниқса, мухлисларимизни алоҳида эътироф этди. Ишқибозлар Андижонни бутун дунёга янада танитди, десак муболаға қилмаган бўламиз.

Худога шукр, Юртимиздаги ҳар бир соҳада ривожланиш бўлаётгани каби футболимизда ҳам ривожланиш бўлаётганини ҳар биримиз кўриб турибмиз. Буни барча тан оляпти. Мана, Олимпиадага биринчи марта чиқдик. Олимпиада иштирок этишни бутун умр орзу қилардик. “Ултрас Бургут” Францияда бутун дунёга мухлислик қилиш даражасини намойиш қилди. Бу борада янги маданият шаклландики, бутун дунё ишқибозларини бирлаштирди ва бу борада катта мактаб яратди.

60 йил кичкина муддат эмас. Лекин келажак энди келяпти. Академия болаларига ҳам айтдик. Бизга сон эмас, сифат керак, тизим керак. Ҳар бир ёш тоифалардаги терма жамоаларни йиллар давомида битта тизим асосида тайёрлаб боришимиз керак. Бу ердаги ёш авлод тарбияланувчилари биринчи ўринда “Андижон” жамоасида тўп суришни мақсад қилиш керак. “Реал” ёки “Манчестер” эмас, биринчи навбатда “Андижон”! Ватанпарварлик шу ердан бошланади. Ундан кейин албатта терма жамоа либосини ҳам кияман, юртимни халқаро майдонларда муносиб ҳимоя қиламан, деган орзу бўлиши албатта лозим. Шунга қараб меҳнат қилса, интилса албатта эришади.

“Андижон” футбол клубига алоҳида база қурилиши бошланди. Бунинг учун “Узавтосаноат” раҳбари Улуғбек ака Рўзиқуловга катта раҳмат. Жамоани ривожланишига улкан ёрдамини беряптилар. Бундай қилинаётган ишлар, ривожланишга қаратилган ва келаси йили Осиё Чемпионлар лигасини муносиб ўтказиш, гуруҳдан чиқиб янада узоққа боришга мақсад қилишимиз керак. Шунчаки иштирок этмаслик керак. “Андижон”га доим энг яхшилари ярашади”, - дейди Эрматов.

Равшан Сайфиддинович сўзини якунлаганидан кейин “Андижон” клубининг 60 йиллик юбилейи муносабати билан ўзбек футболи ривожига қўшган ҳиссаси учун ЎФА томонидан таъсис этилган “кўкран нишон”ларини “Андижон” клуби бош мураббийи Александр Хомяков, U21 жамоаси мураббийи Абдурашид Исмоилов ва “Андижон” фан-клуби раиси Нодирбек Тўйчиевга тантанали равишда топширди.  

Шундан сўнг Тўлаган Исоқов қуйидагидларни айтди:

“60 йиллик юбилей ҳар доим бўлавермайди. Андижон ҳалқи бундай кунларни орзиқиб кутган. Мана, ниятига етди. 60 ёшга тўлганда Ўзбекистон Кубогини қўлга киритишди. ФИФАнинг футзал бўйича жаҳон чемпионатининг бир бўлаги ҳам Андижонда ўтди. Бундай байрам билан Андижон халқини табриклаймиз. Энди жамоани олдида янада катта масъулият турибди. Келаси йили Осиё Чемпионлар лигасида иштирок этади. Жамоани ҳам кучайтириш керак. ОЧЛда фақатгина иштирок билан чекланмасдан, ўзини албатта кўрсатиши лозим. Сизларга омад тилаймиз. Ёшларга насиҳатим: ўзбек футболини келажагисизлар. Қулоғингларга қуйиб олингларки, доим футбол ишқибозларини ҳурмат қилинглар. Нимагаки, футболчиларни кўкка кўтарадиган ҳам мухлислар ва ерга урадиган ҳам мухлислар бўлади. Сизларга омад тилайман!”

Шундан кейин тадбир иштирокчилари, ОАВ вакиллари меҳмонларга ўзларини қизиқтирган саволлар билан мурожаат қилдилар.

Саволим Сервер Жепаровга. Биз ёшларга келажакда ҳақиқий футболчи бўлишимиз учун нима маслаҳат берасиз?

Сервер Жепаров: “Чинакам профессионал футболчи бўлиши учун биринчи навбатда футболни яхши кўриш керак. Машғулотлар вақтида бор имкониятларни ишга солиб, ўзингизни аямасдан, берилган вақт давомида фақат футбол ҳақида ўйлаб шуғулланиш керак. Машғулотлардан бўш вақтда кун тартибига амал қилиш шарт ва яхши овқатланиш лозим. Агар футболни чинакамига севсангиз ҳақиқий профессионал футболчи бўласизлар. Сизларга омад!”

Мирзаҳаким ака сиз қандай шаҳловчи бўлиб қолгансиз? Шу ҳақида гапириб беринг!

Мирзаҳаким Тўхтамирзаев: “Аслида ҳаммага ўхшаб болаликдан маҳаллада тўп тепганмиз. Футболни яхши кўрганмиз. Устозларимиз шарҳларини эшитиб катта бўлганмиз. Вақти келиб Ўзбекистон чемпионати ўйинлари бошланганида Ўзбекистон телевидениясидан футбол ўйинларини шарҳлаб кўришга таклиф тушган. Синовдан яхши ўтганман шекилли, мустақил равишда футбол шарҳлашни бошлаганман. Бу оддий таклиф бўлган. Аслида ўзим Педагогика Институтини тамомлаганман. Рус тили адабиёти ўқитувчисиман. Ҳозир ҳам Университетда спорт журналистикасида талабаларга сабоқ бериб келяпман”.

Саволим Тўлаган Исоқовга. Тоҳир Малик бир гапни айтганди: ҳозирги Месси Тўлаган Исоқовни олдида ип эшолмайди, деган. Бугунги кунда ҳар бир жамоа ҳужумчиларга унчалик ёлчимаяпти. Ҳужумчиларга нима етишмаяпти?

Тўлаган Исоқов: “Савол учун раҳмат. Футболчи ким бўлишидан қатъий назар Худо томонидан берилган иқтидори ҳам бўлиши керак. Агар бу бўлмаса жуда ҳам қийин. Майдонда 11 киши ўйнайди, ҳеч бири бир-бирига ўхшаган бўлмайди. Мана, Биродар Абдураимов ўтирибдилар. Уларни услуби умуман бошқа эди. Мени услубим бошқача эди. Болаларни ўзига озгина қўйиб беришимиз керак. Ҳаммани бир хил ўргатяпмиз. Миржалол Қосимов ҳеч қачон тез югурмаган. Аммо ақлли эди ва майдонда кўра билиши ажойиб даражада бўлган. Кимдир тезлиги билан ютади. Бошқаси техникаси билан, яна кимдир финтлари билан. Болада қайси томонлама иқтидори бўлса, ўша жиҳати устида кўпроқ ишлаши керак”.