Қозоқлар Кевин де Брюйнени иккинчи ўринга олиб чиқди
- 8-сентябр 2025, 09:45
- Zohir Toshxo’jayev
- 0
- Футбол
2026 йилги жаҳон чемпионатининг Европа минтақаси учун саралаш турнири доирасида “J” гуруҳидан ўрин олган Қозоғистон футболчилари олтинчи турда Бельгия терма жамоаси меҳмони бўлиб, ўз дарвозасидан жавобсиз олтита гол ўтказди.
Учрашувда Абдуқодир Ҳусанов билан бирга “Манчестер Сит”да ўйнаган бельгиялик футболчилар – Кевин де Брюйне ва Жереми Докю иккитадан гол урган бўлса, яна иккита гол Николас Раскин ва Тома Мёнье ҳисобига ёзилди.
Ёзда “Манчестер Сити”дан “Наполи”га ўтиб кетган Кевин де Брюйне қозоғистонликлар дарвозасига киритган икки тўпидан кейин Бельгия терма жамоаси тўпурлари рейтингида иккинчи ўринга кўтарилди.
Кевин халқаро миқёсдаги голлари сонини 34 тага етказиб, фаолиятини якунлаган Эден Азардан бир тўпга ўзиб кетди.
Бельгия терма жамоаси тарихида кўп гол уриш бўйича яққол рекордчи Ромелу Лукаку ҳисобланади. Бу форвард ҳозиргача 89 та тўп киритган. Айтиш керакки, жароҳат туфайли майдонга туша олмаётган Ромелу Лукаку декабрь ойига қадар даволанади.