Қозоғистон ОАВ Ўзбекистоннинг ғалабаларига нега салбий реакция билдирмоқда? (фото)
- 4-август 2021, 13:23
- Yahyoxo’ja Ulug’xo’jayev
- 10
- Олимпизм
Сўнгги икки кун давомида Ўзбек спортчилари Токио ареналарида ёрқин ғалабалар қайд этмоқда. Биринчи бўлиб оғир атлетикачимиз Акбар Жўраев Олимпиада чемпионига айланди. Бугун эса бокс бўйича +91 кг вазнда баҳсларда иштирок этаётган Баҳодир Жалолов финал йўлланмасини қўлга киритди.
Бу воқеаларга Қозоғистоннинг SPORTS.kz нашри қуйидагича муносабат билдирди:
"Ўзбек супероғир вазнли боксчиси Баҳодир Жалолов Олимпиада ярим финалида нокдаунга учради. Жанг муддатидан аввал якунланди".
"Ўзбекистон Олимпиадаги иккинчи "олтин"ни қўлга киритди ва медаллар жамғариш бўйича Қозоғистондан узоқлашди".
"Қозоғистон Ўзбекистонга Олимпиададаги иккинчи "олтин"ни қўлга киритишда ёрдам берди".
"Ўзбекистондан бўлган қозоқ боксчиси арман боксчисига мағлуб бўлди ва Олимпиадани тарк этди".
"Йиқилган ўзбекистонлик боксчи қозоғистонликларни Токио Олимпиадасида ғайриоддий зарбалар билан мағлуб этди".
Хулоса
Aфсуски, Sports.kz нашри эълон қилаётган хабабрлар дилни хира қилмоқда. Биласизми, жон қўшниларимизнинг энг нуфузли сайти журналистлари қай мақсадда бундай йўл тутаёганига тушуна олмаяпман.
Ўзбек ва қозоқ халқлари доим бир ота-онанинг фарзандлари саналган. Ер юзида ҳеч қандай миллат биз ва қўшниларимиз сингари ўхшаш тил, урф-одатга эга эмас. Aчинарлиси шундаки, Токио Олимпиадаси чоғида Sports.kz нашри эълон қилаётган хабарларда спортчиларимизга нисбатан салбий муносабат сезилмоқда. Биласизми нима алам қилади? Ушбу ахборот портали бераётган маълумотларда дўстона руҳ мавжуд эмас. Майли, нашр журналистлари бизнинг спортчиларга мухлислик қилмасин, аммо журналистиканинг биринчи шарти - адекватлик қаерда қолди?
Бу мавзуни олиб чиқишдан олдин, яхшилаб Sports.kzни кузатдим. Бизнинг спортчилар иштирокидаги бирорта хабарда адекват сарлавҳага кўзим тушгани йўқ. Бу нимаси, Sports.kz?! Сизлар амалга ошираётган иш икки миллат вакиллари ўртасида низо солишидан қўрқмайсизми? Журналист аслида энг холис инсон бўлиши, воқеага реал кўз билан боқиши лозим!
Наҳотки, мана шундай сарлавҳалар остидаги хабарлар орқали сайт имижини кўтармоқчи бўлсангиз? Сизлар ўз аудиториянгиз олдида спортичиларингизни Ўзбекистон атлетлари билан солиштириб нимага эришяпсиз? Ўйлашимча, ушбу портал вакиллари орасида дунёқараши жуда тор инсонлар фаолият олиб бормоқда. Бошқачасига, ака-ука ўртасига низо солишдан мантиқ кўрмаяпман. Кўзингизни очинг, Sports.kz да ишлаётган "журналистлар"! Ойнанинг орқасида аср XXI кетмоқда. Бундай стилда ишлаш орқали икки миллат нафратидан бошқа ҳеч нарсага эриша олмайсиз.
Яҳёхўжа Улуғхўжаев