Европа Чемпионлар лигасининг амалдаги ғолиби “Пари Сен-Жермен” клуби президенти Носир Ал-Хелаифи 25 ёшли ярим ҳимоячи Витиньяни француз гранди лойиҳасининг марказий фигурасига айлантирди.
Витиньяга Европанинг бир қатор грандлари кўз тикмоқда. Айниқса, “Реал” келаси ёз маҳоратли ярим ҳимоячини трансфер қилиб, унинг ёрдамида майдон марказидаги муаммоларни бартараф этишни режалаштираётган эди.
Португалиялик футболчининг клуб хўжайини томонидан сотилмайдиган ўйинчилар рўйхатига киритилгани “Реал”нинг режаларига жиддий зарба бўлади.
Витинья 2022 йилнинг ёзида “Порту”дан Париж клубига кўчиб ўтган эди. Шу давр мобайнида португалиялик футболчи барча мусобақаларда 183 ўйинда қатнашиб, 25 та гол ва 24 та голли узатма қайд этган.
Витиньянинг “Пари Сен-Жермен” билан амалдаги меҳнат шартномаси 2029 йилнинг ёзигача амал қилади. Transfermarkt маълумотига кўра, футболчининг бугунги кундаги бозор қиймати 110 миллион еврога тенг.