Португалия клуби Антонини ижарага олмоқчи

"Goal" нашрининг ёзишича, "Бенфика" "Манчестер Юнайтед" ҳужумчиси Антонини ижарага олиш имконияти борасида сўров юборган. Бироқ, манчестерликлар бразилиялик футболчини тўлиқ сотишни истамоқда ва уни тахминан 40 миллион еврога баҳоламоқда.

"MaisFutebol" нашрига кўра, икки клуб ўртасида музокаралар ҳозирча давом этмоқда.

Шу билан бирга, Антони ўзи ўтган мавсум иккинчи ярмини ижара асосида ўтказган "Бетис" клубига қайтишни хоҳлаётгани таъкидланмоқда. Испанияликлар ҳам уни қайтаришга қизиқмоқда, аммо МЮ қўйган молиявий талаблар улар учун жуда юқори деб ҳисобланмоқда.

Бундан ташқари, вингерга Саудия Арабистонининг "Ан-Наср" клуби ҳам қизиқаётгани ва фурсат туғилиши билан шартнома таклиф қилишни режалаштираётгани ҳақида хабарлар чиққан эди.