Ўзбекистонлик футболчи фаолиятини Европа клубида давом эттиришга яқин

Абдуғани Камолов Қирғизистоннинг “Бишкек Сити” клубини тарк этиб, Косово чемпионати вакили билан шартнома имзолаши кутилмоқда. Бу ҳақда Asia-Sport.uz телеграм канали хабар берди.

Манбага кўра, ҳозирча жамоа номи маълум қилинмаган, бироқ клубнинг асосий мақсади Европа кубоклари йўлланмасини қўлга киритиш экани қайд этилган.

Агар ушбу трансфер амалга ошса, Камолов Косово чемпионатида тўп сурган илк ўзбекистонлик футболчига айланади.

Маълумот учун, Абдуғани Камолов фаолияти давомида “Шўртан”, “Металлург”, “Бухоро”, “Андижон” ва “Навбаҳор” клублари шарафини ҳимоя қилган.

2025 йил бошида у Қирғизистоннинг “Абдиш-Ата” клуби билан шартнома имзолаган. Ўша йилнинг ёзида эса италиялик мураббий Жованни Костантино таклифига биноан “Бишкек Сити” сафига қўшилиб, жамоанинг етакчи футболчиларидан бирига айланган.