Ўзбекистон улкан ҳурматга лойиқ! Португалия устози Мартинес яна нималар деди?
- 6-декабр 2025, 10:12
- Zohir Toshxo’jayev
- 0
- Футбол
2026 йилнинг 11 июнидан 19 июлигача уч мамлакат – АҚШ, Канада ва Мексика яшил майдонлари мезбонлик қиладиган футбол бўйича жаҳон чемпионатининг 48 иштирокчиси 12 та гуруҳга бўлинди.
Ҳозирга қадар 42 мамлакат миллий терма жамоалари мундиал йўлланмасини нақд қилган. Қолган олти иштирокчи март ойида аниқланади.
Ўз тарихида илк бор жаҳон чемпионатида иштирок этадиган Ўзбекистон миллий терма жамоасининг ҳозирча иккита рақиби аниқ. Булар Криштиану Роналду етакчилигидаги Португалия ва Хамес Родригес бошчилигидаги Колумбия терма жамоаларидир.
“К” гуруҳининг тўртинчи вакили Конго Демократик Республикаси, Ямайка ва Янги Каледония терма жамоалари ўртасидаги саралаш ўйинларидан кейин маълум бўлади.
Португалия терма жамоаси Криштиану Роналду қатнашадиган сўнгги жаҳон чемпионатида чемпионлик учун курашади. Португаликлик 40 ёшли тўпурарни пенсияга жаҳон кубоги билан кузатиш мақсадида мундиалда тиш-тирноғи билан курашади. Жаҳон чемпионлиги Роналду забт этолмаган энг баланд ва ягона чўққи ҳисобланади.
Португалия терма жамоаси бош мураббийи Роберто Мартинес қуръа натижаларидан кейин гуруҳдаги рақиблар ҳақида ўз фикр-мулоҳазаларини билдирди.
- Португалия ва Колумби терма жамоаларининг ўзаро учрашуви алоҳида аҳамият касб этади. Мен бу учрашувни фахр ва ҳаяжон билан кутяпман.
Фабио Каннаваро бош мураббийлик қилаётган Ўзбекистон миллий терма жамоаси улкан ҳурматга лойиқ!
Плей-оффдан мундиалга чиқадиган терма жамоалар эса, ҳар доим ўзгача иштиёқ билан ўйнайди, - деди Роберто Мартинес квартетдаги рақиб жамоалар ҳақида.
Таъкидлаш жоизки, Португалия ва Ўзбекистон миллий терма жамоалари жаҳон чемпионати гуруҳ босқичининг иккинчи турида ўзаро тўқнаш келади. Бу учрашув 23 июнга белгиланган.
Футболчиларимиз жаҳон чемпионатидаги тарихий биринчи ўйинини 18 июнь куни энг кучли терма жамоалардан ҳисобланган Колумбияга қарши ўтказади.
Сўнгги баҳс – 27 июнда плей-оффдан муваффақиятли ўтган терма жамоа билан бўлади.
Ўзбекистон миллий терма жамоаси аъзолари орасида португалиялик футбол юлдузлари билан дўстона муносабатга эга ўйинчилар бор.
Хусусан, Жалолиддин Машарипов Саудия Арабистонининг “Ан-Наср” клубида Криштиану Роналду билан елкама-елка тўп тепган. Қолаверса, ҳамюртимиз жаҳон футболи юлдузига ўзининг 7-рақамини тортиқ этган эди.
Бугунги кунда энг машҳур ўзбек футболчисига айланган Абдуқодир Ҳусанов бўлажак мундиалда “Манчестер Сити”даги уч нафар жамоадошига қарши ўйнашига тўғри келади.
“Шаҳарликлар” сардори Бернарду Силва, Матеуш Нуньеш ва Рубен Диаш Абдуқодир билан яхши муносабатда. Қолаверса, Матеуш Нуньеш ўнг қанот ҳимоячиси позициясида, Рубен Диаш эса, марказий ҳимоячи сифатда “Манчестер Сити”нинг асосий таркибига кириш учун курашда Ҳусановнинг рақобатчиси ҳисобланади.
Ҳусанов “ЖЧ-2026”ни бошламай туриб рекорд ўрнатди!
“Манчестер Сити” Ҳусановнинг жаҳон чемпионатида иштирок этишига қандай муносабат билдирди?
Энди бор умид Шомуродовдан! “Башакшеҳир”да катта йўқотиш
Бу хатодан кейин Гвардиола Ҳусановни асосий таркибга қайтариши шарт