Ўзбекистон мундиалда қаттиқ жанг қилади, лекин..
- 8-декабр 2025, 10:22
- Ali Ahmadxo’jayev
- 0
- Футбол
2026 йилнинг 11 июнидан 19 июлигача АҚШ, Канада ва Мексика майдонлари мезбонлик қиладиган жаҳон чемпионатида иштирок этадиган 48 та терма жамоа гуруҳларга ажратилди.
Ўзбекистон миллий терма жамоаси кучли рақиблар – Криштиану Роналду етакчилигидаги Португалия ва Хамес Родригес бошчилигидаги Колумбияга рўбарў келади.
“К” гуруҳининг тўртинчи вакили Конго Демократик Республикаси, Янги Каледония ва Ямайка терма жамоаларидан бири бўлади.
Айни пайтда футбол экспертлари мундиал иштирокчиларининг имкониятларига баҳо бермоқда.
Sports.uz портали Италиянинг “Фоджа” ва “Болонья” клублари, Россия миллий терма жамоаси собиқ футболчиси Игорь Коливановнинг фикр-мулоҳазаларини ўзбекистонлик футбол ишқибозлари эътиборига ҳавола этади.
- Жаҳон чемпионатига ташланган ушбу қуръанинг ўзига хос томони шундаки, ҳар бир гуруҳда икки кучли ва қолганлари ўртачароқ жамоалар бўлади.
Бу кўпроқ терма жамоалар иштирок этиши учун қилинган усул. Шунинг учун қизиқарли ўйинлар гуруҳ босқичидан эмас, плей-оффдан бошланади. Лекин айрим гуруҳларда сюрпризлар бўлиши ҳам мумкин.
- Ўзбекистон Португалия ва Колумбияга қарши гуруҳда сюрприз кўрсата оладими? Ўзбеклар нималарга умид қилиши мумкин?
- Менимча, Ўзбекистон терма жамоаси ҳали ҳеч нарсага даъво қила олмайди. Шунингдек, сюрприз бўлади, деб ҳам ўйламайман.
Албатта, ўзбеклар жанг қилади, қаттиқ ҳаракат қилади. Лекин рақибларнинг даражаси барибир сезилади, - деди Игорь Коливанов.
Ўзбекистон миллий терма жамоаси жаҳон чемпионатидаги дебют учрашувини 18 июнь куни энг кучли терма жамоалардан ҳисобланган Колумбияга қарши ўтказади.
Ўзбекистонлик футбол ишқибозлари алоҳида қизиқиш билан кутаётган Португалия терма жамоасига қарши иккинчи тур учрашуви 23 июнга белгиланган.
Гуруҳдаги сўнгги баҳс – 27 июнда плей-оффдан муваффақиятли ўтган терма жамоа билан бўлади.