Ўзбекистон 32 та терма жамоа орасида 30-ўринни эгаллади

Испанияда гандбол бўйича аёллар ўртасида ўтказилаётган жаҳон чемпионатида Ўзбекистон терма жамоаси  ўз иштирокини якунлади. Бу ҳақда Ўзбекистон Миллий олимпия қўмитаси расмий сайти хабар тарқатмоқда.

29-30 ўринлар ўз эгаларини топиши белгиланган беллашувда қизларимиз парагвайлик рақибаларига қарши майдонга чиқди. Учрашувнинг биринчи тайми 19:19 ҳисобида якунланган бўлса, иккинчи таймда рақиблар аниқ зарбалар билан мувозанатни ўз томонларига оғдириб кетишди. Якуний ҳисоб – 39:33. Баҳсда рақиб дарвозасини 11 бор ишғол қилган О.Абдуманнонова энг сермаҳсул ўйинчи бўлди.

Шу тариқа, терма жамоамиз ўз тарихида иккинчи бор иштирок этган жаҳон чемпионатини 32 жамоа орасида 30-ўринни эгаллади.