Ўзбек легионерининг жамоада номи бор, ўзи йўқ!

Чимкентнинг “Ордабаси” клуби охирги икки мавсумда ўзбекистонлик футбол ишқибозлари учун анча қадрдон бўлиб қолди.

2023 йилги мавсумда бу клуб ўз тарихида илк бор Қозоғистон чемпионлигига сазовор бўлди. Чимкентликларнинг тарихий ғалабага эришишида ўзбек футболи мактаби тарбияланувчиларидан Шаҳбоз Умаров ва Бобур Абдухолиқовнинг ҳиссаси катта бўлди.

Чемпионатнинг йигирма олтита учрашувидан 22 тасида майдонга тушган ҳужумкор футболчимиз Шаҳбоз Умаров  учта учрашувда, яъни “Шахтёр”га қарши иккита баҳсда ва “Жетису”га қарши ўйинда биттадан гол уришга муваффақ бўлди. Шаҳбоз тўп киритган бу учрашувларнинг барчасида жамоаси ғолиб чиқди.  

Бобур Абдухолиқов Премьер-лиганинг барча – 26 та учрашувда майдонга тушган “Ордабаси”нинг ягона ўйинчиси бўлган ҳужумчининг жамоа учун қандай аҳамиятга эга бўлганини кўрсатди. Бу баҳсларда Бобур еттита гол урди.

Абдухолиқовнинг ҳар бир голи “Ордабаси”га учрашувни уч очко билан якунлаш имконини берди.

Чемпионлик мавсумидан кейин Умаров Чимкентда қолишни, Абдухолиқов юртимизга қайтишни маъқул кўрди. Бобурнинг ўрнини “Реал”га “Сантьяго Бернабеу”да урган голи билан танилган Жасурбек Яхшибоев эгаллади.

2024 йилги мавсумда “Ордабаси” сўнгги паллада совриндорлар қаторидан тушиб қолган бўлса-да, индивидуал жиҳатдан Шаҳбоз ва Жасур яхши натижаларни қайд этди. Айниқса, Яхшибоев 17 та ўйинда тўққизта гол киритиб, жамоасининг энг яхши тўпурари бўлди. Умаров бу гал бир жуфт гол билан кифояланди.

“Ордабаси” янги мавсум олдидан таркибда жиддий ўзгаришлар қилди. Клуб чемпионлик мавсуми ва ундан кейинги бир йилда жамоа шарафини ҳимоя қилган тажрибали ўйинчилар билан ҳам орани очиқ қилди.

Қозоғистон футболини ёритаётган манбаларнинг маълум қилишича, чимкентликлар мавсумлар оралиғида Златан Шехович, Всеволод Садовский, Режинальдо, Артём Беседин, Игорь Пластун, Сергей Игнатович, Ловро Цвек, Кристиан Товар, Шаҳбоз Умаров, Бауиржан Исламхон, Темирлан Ерланов, Ғафуржон Суюмбаев, Максим Федин ва Азамат Жомартов билан расман хайрлашди.

Асосий таркиб ўйинчиларидан Сергей Малий, Асхат Тагыберген, Еркебулан Тунгишбаев, Бекхан Шайзада, Султонбек Астанов, Сагадат Турсинбай, Евгений Макаренко ва Самат Жаринбетов “Ордабаси”да қолди.

Жамоа тўпурари Жасурбек Яхшибоевнинг тақдири ҳозирча мавҳум бўлиб турибди. 27 ёшли легионер билан клуб расман хайрлашмаган, лекин ўзбек футболчиси жамоа билан бирга эмас. Яъни, “Ордабаси” йиғинларида қатнашгани йўқ.

Бундан бир неча ҳафта илгари Жасурбек Озарбайжоннинг “Нефтчи” клуби билан музокара ўтказаётгани айтилганди. Бироқ бу масала ҳақида бошқа маълумот йўқ.

Бир сўз билан айтганда, “Ордабаси” юлдузлари сифатида тўп тепган Шаҳбоз ва Жасур фаолиятини қайси жамоада давом эттириши ҳозирча номаълум бўлиб турибди. Аҳамиятли томони шундаки, ҳар икки ҳужумкор футболчи Ўзбекистон миллий терма жамоасига номзод иқтидор эгалари саналади. Демак, улар яна терма жамоадан таклиф олиш учун, энг аввало, клуб миқёсидаги фаолиятини йўлга қўйиб олиши керак...

Улар орасида Ҳусанов ҳам бор! “Барселона” манчестерликлар трансферларига муносабат билдирди

Жаҳон чемпиони Ҳусановга қандай баҳо берди?

Гол Ҳусанов келажагига қандай таъсир қилишини айтишди!

Рақиблар мураббийи: Шомуродов ёқмайди, десам аҳмоқ бўламан!

Файзуллаев Роналду билан бир турнирда ўйнаши мумкин