Ўринбоев: Биринчи ўйин ҳар доим қийин бўлган, кейинги учрашувдан умуман бошқа жамоани кўрасизлар!

Хитойда бўлиб ўтаётган 20 ёшлилар ўртасидаги Осиё кубогининг биринчи турида Ўзбекистон Яманни кичик 1:0 ҳисобида мағлуб қилиб, 3 очкога эга чиқди. Ушбу учрашувдан кейин турнирдаги биринчи голимизни урган ва жамоа сардори ҳисобланмиш Муҳаммадали Ўринбоев билан "Sports.uz" кичик интервью ташкил қилди. 

Биринчи савол Яманга қарши учрашув ҳақида: ўйин қанчалик сизлар кутгандек ўтди, ўз режаларингизни неча фоизга ўхшади, деб айта оласиз?

Ассалому Алайкум авваламбор барчага, Яманга қарши ўйин кутганимиздан кўра жуда оғир ўтди, деб ҳисоблайман. Жамоа бизга муносиб қаршилик кўрсатди. Учрашув биз учун жуда яхши бошланди, ҳисобни очдик, мураббийимиз берган барча вазифани бажаришга ҳаракат қилдик. Энг асосийси, ғалабага эришдик, қолгани муҳим эмас. Биринчи ўйин ҳар доим қийин ўтади. Кейинги баҳсда умуман бошқа жамоа ва бошқа ўйинни кўрасизлар!

Сизга нисбатан жуда кўп қўполлик ишлатилганини кўрдик, айрим эпизодларда оғриқ билан ҳам ҳаракат қилаётгандек кўриндингиз. Жароҳат олганингиз йўқми?

Ҳа, бу ўйин мен учун хам жуда оғир ўтди. Биз учун ғалаба муҳим эди. Шу сабабли, боримизни бериб ўйнадик. Жароҳатга келсак, риск қилишни истамадим. Кейинги баҳсга 100 фоиз тайёр бўлишга ҳаракат қиляпман.

Гол урдингиз ва голни ноодатий тарзда нишонладингиз, буни олдиндан режалаштирганмидингиз ёки гол урилганидан кейин хаёлга келдими?

Гол нишонлашим ўйиндан олдин режалаштирилганди ва бу услубни "Salt Bae" (Нусрет)га нисбатан ўйлагандим. Ўзи кўзойнак ишораси билан нишонламоқчи эдим, лекин учрашув олдидан ҳакамдан бу ҳақида сўраганимда, огоҳлантиришини айтганди. 

Гуруҳдаги асосий рақибимиз бу Эрон. 3-турда бўладиган "финал" ҳақида гапирсангиз.

Ўйлашимча Эрон билан ўйин жуда қизиқарли, голларга бой бўлади. Ҳозир Индонезияга қарши баҳсга тайёргарлик кўряпмиз. Менимча, иккинчи турда ғалаба қозонсак, плей-оффга чиқиш имкониятимиз кўпаяди.