Олимхўжа Бўронов: Дарвоза дахлсизлигини сақлаб қола олсак, 1-2 та гол уришимизга ишоняпман

Хабарингиз бор, бугун Ўзбекистон миллий терма жамоаси Жаҳон чемпионати-2026 саралаши доирасида Эрон терма жамоаси билан ўйнайди. Ушбу учрашув олдидан футбол жамоатчилиги фикрини ўргандик.

Қуйида Stadion.uz сайти бош муҳаррири ҳамда Футбол қоидалари телеграм канали асосчиси Олимхўжа Бўроновнинг ўйинолди фикрлари билан танишиб чиқишингиз мумкин:

Бугунги баҳсда Ўзбекистон терма жамоасидан ғалаба кутяпман. Бунга бир нечта сабаблар бор.

1) Темур Кападзе Қирғизистонга қарши жамоамизнинг ўйинини ҳамда Эроннинг сўнгги ўйинларини таҳлил қилиб чиққанига шубҳа йўқ. Шундан келиб чиқиб, мураббий керакли ўйин услубини танлаган ва буни футболчиларга тушунтириб, машғулотда синовдан ўтказиш учун имкониятга эга бўлган (вақт нуқтаи назаридан).

2) Терма жамоамиз етакчилари (Элдор Шомуродов, Жалолиддин Машарипов) берган сўнгги интервьюлар шундан далолат берадики, футболчиларимиз Эрондан руҳий жиҳатдан қўрқишмаяпти. Бу эса жуда муҳим омил.

3) Эроннинг ўзи ҳам аввалгидек кучли эмас, назаримда.

Машарипов айтдики, Сречко Катанец Ўзбекистон терма жамоасида фаолияти давомида жамоамизга ҳимояда тартибли ўйнашни ўргатди ҳамда ҳужумда гол уриш учун имкониятларимиз албатта бўлишини тушунтирди. Айнан шу нарсанинг самара берадиган пайти келди, деб ўйлайман. Демак, биз мудофаани мустаҳкамлаган ҳолда қарши ҳужумда ўйнашимизни кутяпман. Шу билан биргаликда, жамоамиз ҳуда-беҳудага тўпни йўқотмасдан, тўп назоратини ҳам яхшилаши керак (буниси Темур Кападзега боғлиқ).

Агар биз дарвоза дахлсизлигини сақлаб қола олсак, Эрон дарвозасига 1-2 та гол ура олишимизга ишоняпман. Голни кимлар уриши мумкин? Ҳужумга ўтадиган футболчилардан баъзилари (Шомуродов, Файзуллаев, Алижонов, Сайфиев, Ўрунов, Шукуров).

Ўзбекистон камида иккинчи ўрин билан ЖЧ-2026 йўлланмасини қўлга киритишига ишонаман. Жамоамиз шундай ажойиб имкониятни, насиб қилса, қўлдан чиқариб юбормайди.