Ниҳоят, "Бухоро" ўз уйига қайтмоқда

ЎзПФЛ матбуот хизматининг хабар қилишича, Суперлига 22-туридан ўрин олган Бухоро — Навбаҳор ўйини 20 сентябрь куни Бухоро вилояти футбол академияси майдонида бўлиб ўтади. 

Аввалроқ Бухоро футбол академиясининг футбол майдони Суперлига беллашувларини қабул қилиш учун тайёргарлик кўраётгани маълум қилинганди. Айни вақтда вилоят ҳокимлиги ва Лига стадионни катта ўйинга тайёрлаш ишларини олиб бормоқда. 

Бунга қадар клуб ўз уй учрашувларини турли шаҳар ва стадионларда ўтказишга мажбур бўлаётганди. Ўтган давр ичида маҳаллий ҳокимият Лига томонидан қўйилган талабларни босқичма-босқич бажаришга эришди. Эндиликда "Бухоро" ўз мухлислари кўз ўнгида тўп суриш имкониятига эга бўлади.