Неймар "Олтин тўп"га қайси футболчи энг муносиб эканини айтди

Саудия Арабистонининг "Ал-Ҳилол" клуби ва Бразилия терма жамоаси ҳужумчиси Неймарнинг фикрича, "Реал"даги ҳамюрти Винисиус Жуниор "Олтин тўп"ни олиши керак.

“Мен “Олтин тўп”га номзодлар орасида Винисиус тарафдориман. Ундан бошқа ҳеч ким бунга муносиб эмас. У ҳақиқий жангчи, фаолияти давомида кўп азоб чекди, ўзидан кутилганларнинг барчасини уддалади, барча танқидларни енгиб ўтди ва бугун биз учун буюк қаҳрамонга айланди”, — деди 32 ёшли бразилиялик футболчи.

Маълумот учун, "Олтин тўп" тақдирлаш маросими 28 октябрь куни Парижда бўлиб ўтади. Унда 2023/2024 йилги мавсум учун қуйидаги совринлар топширилади: эркаклар ўртасида “Олтин тўп”, аёллар ўртасида “Олтин тўп”, Копа Трофи (21 ёшгача бўлган энг яхши футболчи), Яшин Трофи (энг яхши дарвозабон), Герд Трофи Мюллер ( ўтган мавсумнинг энг яхши тўпурари), эркаклар ўртасида "Йил клуби", аёллар ўртасида "Йил клуби". Бу гал совринлар қаторига яна иккита янги номинация қўшилди: эркаклар ўртасида "Йил мураббийи" ва аёллар ўртасида "Йил мураббийи". Ушбу мукофотлар соҳадаги муваффақият қайд этган мутахассисларни эътироф этади.