"Нефтчи"ни селекциясига мени нима алоқам бор?" ёхуд Жаъфар Ирисметовни Левченко билан муносабати қандай?

Охирги пайтларда таниқли футбол одами Жаъфар Ирисметовни “Нефтчи”да спорт директори сифатида иш бошлаши ҳақидаги гаплар яна қулоққа чалиняпти. Ўтган йили ҳам “Пахтакор”нинг собиқ спорт директорини “Нефтчи” боғлашмоқда. Вазиятга ойдинлик киритиш мақсадида Sports.uz журналисти Ирисметов билан боғланди.

- Жаъфар ака, охирги пайтларда сизни яна "Нефтчи" билан боғлашмоқда. Клуб сизга таклиф билан чиққани ростми ва бу қанчалик ҳақиқатга яқин?

- Ҳозирча “конкрет” бир гап йўқ. Расман шартнома тузилмагунча бирор нарса дейиш қийин. Ҳар йили “Бунёдкор” чақиради, “Қизилқум” чақиради, яна униси-буниси чақиради (кулади). Матбуотда хабарлар чиқяпти. Аммо охир-оқибат қандайдир сабаблар туфайли ҳаммаси тўхтаб қоляпти. Шу боис ҳозирдан аниқ гап айтиш мушкул.

- Биламизки, "Нефтчи" ўтган йили ҳам сизни чақирганди. Аммо ўшанда Левченко сабабли сизни бу клубга ўтишингиз амалга ошмай қолгани ҳақида эшитгандик. Шу ростмиди?

- Тўғри, олдинги йили таклиф бўлган. Бироқ нима сабабданлигини аниқ билмайман. Левченко сабабчимиди ёки ундай эмасми, хабарим йўқ. Хуллас, шартнома амалга ошмай қолган. Хафа бўлиш йўқ, ҳаёт давом этади. Ишлаш керак. Тўғриси, биз ҳам ёшлигимиздан футболга умримизни бағишлаганмиз. Ўзбекистон учун ўйнаганмиз. Керак бўлса, катта-катта клублардан таклифларни терма жамоа учун “отказ” қилган одаммиз. Шу сабабли биз ҳам футболда ишлашимиз керак, деб ўйлаймиз. Нафақат ишлашимиз, балки фойдамиз ҳам тегади, деган умиддаман. Кўп нарсани биламиз, кўп нарсани ўрганганмиз. Худо насиб қилиб, ишласак ўз ишимиздан келиб чиқиб, яна яхши натижалар кўрсатишга ҳаракат қиламиз.  

- Рости, сизга "Нефтчи" клубидан ҳақиқатан яна аниқ таклиф тушдими? Ким сиз билан алоқага чиқди?

- Ҳали бундай аниқ таклиф бўлгани йўқ. Шунчаки, матбуотда “Нефтчи”да иш бошлаши мумкин, деб ёзиляпти. Ҳар йили нимагадир журналистлар мени “Нефтчи” билан боғламоқчи бўлишади. Балки “Нефтчи”даги ҳолат шунақа ёзишга мажбур қилаётгандир. Клубга балки спорт директори керакдир. Яна Худо билади. Насиб қилиб, шартнома тузилса билиб оласиз. Иш бошлаш учун шартнома тузиш керак, шартнома бўлмаса ҳаммаси гаплигича қолиб кетаверади.

- Умуман, сизни Виталий Левченко билан муносабатингиз қандай? Агар сиз келсангиз у кетиши мумкин, деган гаплар ҳам йўқ эмас...

- Мени Левченко билан муносабатларим жойида. Тўғрисини айтсам, биз у билан муносабатларимиз яхши ёки ёмон бўлиши учун гаплашиб турмаймиз. Агар гаплашиб турган бўлганимда ёки яқиндан таниганимдами, шунда қанақадир муносабатлар ҳақида гапирса бўларди. У билан телефонда ҳам гаплашмайман, гаплашмаганман. У менга қўнғироқ қилиб, буни ундай ёки бундай қилсам бўладими, деб сўрамайди. Яхши ёки ёмон деб айтиш қийин. Мен келадиган бўлсам, Левченко қоладими ёки кетадими, буни билмайман. Бу масалани раҳбарият ҳал қилади-ку. У ерга бормасам бундай гапларни нима фойдаси бор?

- "Нефтчи" клубини янги мавсум учун селекция ишларини бевосита сиз олиб бораётганингиз ҳақида ҳам узун-қулоқ гаплар йўқ эмас...

- “Нефтчи” клубини селекциясига мени нима алоқам бор? Селекцияни у ердаги спорт директори олиб борса керак, яна билмадим.

- Умуман олганда, Жаъфар ака, сизга аниқ қайси клублардан таклифлар бор?

- Ҳозирча бундай таклифлар йўқ. Ҳамма клубларда спорт директорлари яхши ишлаяпти. Шу боис таклиф бўлмаяпти, деб ўйлайман. Чунки ҳаммани вазифани яхши бажаришяпти-да. Майли, бўлиб қолар, Худо насиб қилса ишлармиз. Ҳаммаси Аллоҳни хоҳиши билан бўладиган нарсалар. Ўз вақтимизни кутяпмиз. Кимдир ишонч билдириб чақирса, бориб қўлдан келганича ёрдам берамиз.

Шуҳратбек Жўраев.