"Насаф"да "дух" йўқ?!

Яқинда ижтимоий тармоқларда бир мутахассиснинг фикрига кўзим тушиб қолди. Унда ёзилишича, Қаршининг "Насаф" жамоасида "дух" йўқ экан. Ҳозир шу мавзуга атрофлича тўхталиш учун жуда қулай фурсат...

Кеча ОЧЛ гуруҳ босқичидан ўрин эгаллаган "Насаф" - "Ал-Виҳдат" баҳси "аждарлар"нинг 2:0 ҳисобидаги ғалабаси билан якунланди. Ўйини томоша қилар эканман, "дух"и йўқ жамоа шуми деб ўйланиб қолдим. "Сўнгги 20 йил ичида Ўзбекистонда биринчи рақамли бўлишни уддалай олмаган"и иддао қилинган жамоа Осиё чемпионлар лигасида 4-очкосини қўлга киритди. Балки, бу биринчи турдаги "Ал-Садд" билан ўйиндаги эҳтиёткор тактика фонида ҳиссиёт билан ёзилган фикрдир, аммо Бердиев ҳам кеча футболга кирган одам эмас.

Асосий қурол майда пас ва комбинациялар бўлган қатарликларга қарши 3 та марказий ҳимоячи билан тўп суришга қарор қилди. Олдинда эса, мобилроқ бўлган Норчаевдан кўра, "таран" форвард Семир Смайлагични танлади. Бунинг учун уни қўрқоқликда айблаш қай даражада тўғри? Ҳар ҳолда, таркиб, ном ва моддий томондан ўзидан анча кучли бўлган "Ал-Садд"га қарши бундан ортиқ қандай схемани қўллаш мумкин эди?

Биринчи қизил карточкадан сўнг Бердиев жамоа ўрганган 4 ҳимоячилик схемага ўтишни истамади, таваккал қилгиси келмади. Якунда бу қарор ўзини оқлади. Қаршиликлар тўп назоратини қўлига олиб, темпни ўзи белгилашни бошлади. Иккинчи четлатиш эса, Бердиевни ўйлантириб қўйгани рост. Таблода 1:1 ҳисоби ёниб турган пайтда, мураббий ўз режаларини ўзгартиришни бошлади. Захирадан янги кучларни майдонга тушириб, 3-6-1ни (Алибек Давронов деярли марказий ҳимояда ўйнади. Муҳиддинов унинг қанотидан ҳужумга ўтиб, Алибекни кўпроқ ҳимояга эътибор қаратиши учун имконият яратди) 4-3-3га ўзгартирди, аммо футболчилар унга мослашишга улгургани йўқ. Натижада, 2 киши кўп бўлиб ҳаракат қилган "Насаф" минимал ҳисобдаги дурангга имзо чекди Шу ўринда адолатли савол туғилади, "аждарлар" нима учун ўйинни икки киши кўп бўлиб тугатди? Бундай устунликни таъминлаш учун йигитлар майдонда кўпроқ прессинг қилгани, ҳар бир эпизодда охиригача кураш олиб боргани ҳеч кимнинг ҳаёлига келгани йўқ. Барча, жамоа устунликдан фойдалана олмаганини пеш қилди. Ваҳоланки, ўша устунликни майдонда "аждарлар"нинг ўзи яратмадими? Ёки "Ал-Садд" ўйинни 9 киши бўлиб бошлаганмиди?

"Ал-Виҳдат"га қарши ўйинда Бердиев 4-3-3нинг оригинал версиясини қўллади. Қанот ҳимоячиларини кенгроқ жойлаштириб, очиқ футбол ўйнади. Иккинчи таймда ўзгаришларни "топди" ва баҳсда бурилиш ясади. Йигитлар 90 дақиқа давомида интенсив футбол намойиш этишга уринди.

Ўз вақтида дарвозабон ҳам жамоасини қўллаб юборди. Бир сўз билан айтганда, яхлит машинага айланган "Насаф" рақибни таслим этди. Ўз исмини сир қолишини истаган мутахассис қаршиликларни ўз кучига ишонмасликда айблагани мени ҳайрон қолдирди. Қандай қилиб ОЧЛга саралаш орқали меҳмонда ўзидан ҳар жабҳада устун бўлган "Банияс"ни тиз чўктириб ташриф буюрган клуб ҳақида бундай ўйга бориш мумкин? Қандай қилиб бир неча ойлаб маош олмасада, майдонга бор кучини ташлаб чиқиб кетадиган ўзимизнинг йигитларни руҳан кучсиз деб ўйлаш мумкин? Ўзи учун ўзи ОЧЛга йўл очган, бошқа бир ўзбек жамоасига халқаро майдонни "совға қилган" "Насаф"ни қандай қилиб кучсизликда айблаш мумкин? Аслида, оғир кунларда ҳам ўз кучига ишончини йўқотмаганлар кучли шахс саналмайдими? Билмадим, балки ўлчовларимиз турличадир...

20 йилдан бери Ўзбекистонда биринчи рақамли бўла олмаган жамоанинг бошқа натижаларига ҳам кўз ташлаб қўйиш лозим. Суперкубок ва Ўзбекистон кубокларидаги ғалабалар ўз йўлига, аммо халқаро майдондаги Ўзбек клубларининг 30 йилдан бери ягона бўлиб турган соврини ҳам "Насаф" музейида турганини қандай унутиб қўйиш мумкин. Майли, бу ОЧЛ бош соврини эмасдир, аммо ўша даврдаги "Насаф" ўз бўйидан баланд сакрай олгани факт. Уни инкор этишга ҳеч кимнинг ҳаққи йўқ. Майли, бугунги 3 очко ҳам ўз йўлига. Ғалаба ва мағлубият доимо ёнма-ён бўлган. Футболда энг муҳими - даражани ушлаб қолиш. Ҳозирча, "Насаф" Ўзбекистон чемпионлигини қўлга киритмаган бўлсада, аллақачон брендга айланиб бўлди. Бу брендга миллионлаб долларлар сарфланмади. Унинг замирида борига шукур қилишга ўрганган инсонларнинг меҳнати ётади. Айни дамда "Пахтакор" сингари халқ жамоасига айланиб бўлган "Насаф"ни "дух" йўқлигида айблашдан олдин, бироз дўппини қўлга олиб ўйлаб кўриш керак. Ҳар ҳолда, ҳозир Саудия Арабистонида биз эмас, улар миллат шарафини ҳимоя қилишмоқда.

Яҳёхўжа Улуғхўжаев