Можароларга ўралашиб қолган Эквадор терма жамоаси билан танишамиз ёхуд мундиалга 31 кун қолди!

ЖЧ-2022 стартига тобора оз вақт қолмоқда. Мухлис ва мутахассисларни интизорлик билан куттираётган турнир тез орада бошланади.

Қайси терма жамоалар ЖЧ-2022да иштирок этишини яхши биласиз. Агар ҳамон бундан хабардор бўлмасангиз яна бир  бор эслатиб ўтиб кетамиз.

Мундиал стартига 31 кун қолган ва биз кетма-кетликда термалар билан сизни таништириб ўтамиз. Демак, "A" гуруҳи вакили Эквадор орқали ўзига хос "челленж"имизни давом эттирамиз.

Эквадор терма жамоаси, Эквадор футбол федерацияси (FEF)

Ташкил топган: 1925 йил (ФИФА'га 1926 йилда аъзо бўлган).
Бош мураббий: Густаво Алфаро.
Жамоа сардори: Эннер Валенсия.

Илк расмий баҳси: Боливия - Эквадор 1:1 (1938 йил).
Энг йирик ғалаба: Эквадор - Перу 6:0 (1975 йил).
Энг йирик мағлубият: Аргентина - Эквадор 12:0 (1942 йил).

Айни дам мазкур терма жамоа FIFA рейтингида 44-ўринни банд этиб турибди. Уларнинг рейтингда энг юқори кўрсаткичи 10, энг пасти эса 71-ўрин бўлган.

Ушбу юрт термаси бунга қадар ўтказилган Жаҳон Чемпионатларида 4 бора иштирок этган. Илк бор Эквадор 2002 йилги Жанубий Корея ва Япония яшил майдонларида ўтган мундиалда қатнашишга муваффақ бўлган. Энг яхши натижаси 2006 йилда қайд этилган. Ўшанда жамоа нимчорак финал босқичига чиқишга эришган. 

Турниргача босиб ўтилган йўл

Эквадор терма жамоаси Мундиал йўлланмаси учун кечган саралаш баҳсларида муносиб иштирок этди. Улар бу мақсадлари йўлида ҳатто, номдор рақиблари Колумбия ва Чилини ҳам ортда қолдирди. 

Саралаш турнирида "уч ранглилар" 26 очко билан 4-ўринни банд этди. 7 ғалаба, 5 дуранг ва 6 мағлубият қайд этган терма вакиллари 27 гол уриб, ўз дарвозасидан 19 гол олиб чиқди. 

Бундан ташқари, Эквадор ЖЧ-2022га тайёргарлик олиб бориш мақсадида халқаро ўртоқлик учрашувлари ўтказди:

Таркибдаги футболчиларнинг трансфер нархи таниқли "Transfemarkt" талқинига кўра, 125.80 миллион еврони ташкил этади.

Эслатма: Ушбу миқдор сўнгги йиғинга чақирилган футболчиларнинг трансфер нархига кўра ҳисобланган. Мундиалга чақирилган ўйинчилар номи ҳали маълум эмас.

Сохта паспорт, Чилининг шикояти ва ФИФАнинг якуний қарори

Қатар мезбонлигида ўтадиган мундиалга йўлланмани қўлга киритган Эквадор турнирдан четлатилиши ҳам мумкин эди. Бунга Чили Футбол Федерациясининг шикояти сабаб бўлди.

Унга кўра, Чили терма жамоаси адвокати футболчи Байрон Кастильо колумбиялик экани, у сохта туғилганлик ҳақида гувоҳнома (паспорт) дан фойдалангани ва Эквадор терма жамоасида ўйнаш ҳуқуқига эга эмаслиги ҳақида далиллар топгани ҳақида маълумот берди. Шу билан бирга, чилиликлар Жаҳон чемпионати финал турнирида эквадорликларнинг ўрнига боришни даъво қилди.

ФИФА расмий саҳифаси тарқатган маълумотга кўра, ташкилот интизом қўмитаси Эквадор футбол федерациясига қарши очган ишни тугатди. Фақатгина асли колумбиялик Кастильо Эквадор МТЖ либосида 8 та баҳсда қатнаша олмайдиган бўлди.

"Томонлар ФИФАнинг Апелляция қўмитасига шикоят қилишлари мумкин", - дея ёзиб қолдирилди ташкилот баёнотида. 

ЖЧ-2022'даги тақвими

Аввал айтганимиздек, Эквадор футбол бўйича энг нуфузли турнирнинг "A" гуруҳида Нидерландия, Сенегал ҳамда Қатар каби термалар билан бир гуруҳдан жой олган. Уларнинг тақвими қуйидагича:

20 ноябрь

21:00 Қатар - Эквадор.

25 ноябрь

21:00 Нидерландия - Эквадор.

29 ноябрь

20:00 Эквадор - Сенегал.

 

Шоҳрух Зоиров тайёрлади.