“Металлург” янги мавсумни қаерда бошлаши маълум
- 10-феврал, 18:12
- Abdukarim Atayev
- 0
- Футбол
Металлург Пролигада иштирок этиш бўйича Liga томонидан қўйилган минимал талабларни бажаришга эришди. Бу ҳақда ЎзПФЛ хабар бермоқда.
“Ўзметомбинат” АЖ томонидан йўлланган хатга жавобан Liga Металлург клубини қатнашчилар сафига қайтариш бўйича ишлар кетма-кетлигини баён қилганди. Шу асосда, комбинат томонидан жорий йилнинг 23 январь куни Улуғбек Мирзаев Металлург клуби бош директори этиб тайинланди.
Liga талабига кўра, клуб биринчи галда FIFA Legal Portal ва FIFA TMS платформаларига кириш ҳуқуқини қайтариб олиши лозим эди. Мазкур иш амалга оширилди ҳамда унда акс этган легионер футболчи олдидаги қарздорлик масаласига ойдинлик киритилди. Кейинчалик, Металлург қарздорликни бартараф этиш юзасидан иш олиб борди ва 9 февраль куни FIFA Металлург клубидан трансфер тақиқини олиб ташлади.
Эндиликда, клубга янги футболчиларни рўйхатдан ўтказиш учун MyLeague платформасидан фойдаланиш ҳуқуқи тақдим этилади. Биринчи навбатда, клуб раҳбар органи рўйхатга олинади ва шундан кейин профессионал меҳнат шартномалари рўйхатдан ўтказилади. Шунингдек, клуб қошидаги академия футболчилари лицензиялаш талаблари асосида Liga платформасига киритиб чиқилади.
Металлург таъсисчиси “Ўзметомбинат” АЖ клубнинг йиллик харажатлар сметасини тасдиқлаган бўлиб, ундан Бекобод шаҳридаги стадионни Пролига ўйинларига тайёрлаш харажатлари ҳам жой олган. Айни вақтда стадионда бу борада ишлар бошлаб юборилган.
Юқоридагилардан келиб чиқиб, Liga Металлург клубининг Пролига иштирокчилари сафига қўшилганлигини маълум қилади.
