“Реал” ҳужумчиси Килиан Мбаппе тиззасидан олган жароҳатидан тикланаётганига қарамай, март ойида АҚШда ўтказиладиган ўртоқлик ўйинларига Франция терма жамоаси билан бориши мумкин.
Бу ҳақда AS нашри хабар берди.
Нашр маълумотига кўра, Мбаппе Бразилия (26 март) ва Колумбияга қарши (29 март) ўйинлар учун рўйхатга киритилган.
Бироқ унинг АҚШда бўлиши асосан тижорий сабаблар ва ҳомийлар олдидаги мажбуриятлар билан боғлиқ.
Агар у бормаса, молиявий йўқотишлар жуда катта бўлиши кутилмоқда. Шу билан бирга, француз шифокорлари ва Дидье Дешам бошчилигидаги мураббийлар штаби футболчининг соғлиғини хавф остига қўймоқчи эмас.
Агар у тўлиқ тайёр бўлмаса, бирорта ҳам ўйинда иштирок этмайди. Асосий мақсад — Мбаппени жаҳон чемпионатига энг яхши формада тайёрлаш.
Футболчининг ўзи ҳам тикланиш жараёнини тезлаштирмасликка ва майдонга тушишга шошилмасликка қарор қилган.
Ҳатто Мбаппе “Манчестер Сити”га қарши Европа Чемпионлар лигасининг энг муҳим ўйинларини ўтказиб юборишга ҳам тайёр.
Килианнинг тиззадаги жароҳати Францияда жиддий хавотир уйғотмоқда. Айниқса, ўтган Европа чемпионатида Мбаппе бурни синганидан кейин тўлиқ куч билан ўйнай олмаган эди.