Мбаппе: "Бу шунчаки ўртоқлик ўйини эмас эди"

Килиан Мбаппе Бразилияга қарши ғалаба (2:1)дан сўнг ўз фикрлари билан ўртоқлашди.

27 ёшли ҳужумчи ўйинда 66 дақиқа ҳаракат қилди ва Франциянинг илк голига муаллиф бўлди.

"Мен футболчиман. Менинг ягона истагим — доимо майдонда бўлиш ва ўйнаш. Бу ажойиб ўйин бўлди. Майдонда бўлиш имконияти берилганини ҳеч қачон оддий қабул қилмайман.

Биз учун бу шунчаки ўртоқлик ўйини эмас эди. Биз Бразилияни жуда ҳурмат қиламиз. Бу ўз даражамизни текшириш учун яхши имконият бўлди. Албатта, бу ўйиндан ортиқча хулоса чиқариш керак эмас.

Мен буни жаҳон чемпионати финали эди деб айтмайман, лекин бундай ўйин ўтказиш жуда яхши.

Биз яхши темп кўрсатдик. Ўйинимизда ҳаракатчанлик, креативлик етарли бўлди. Кўплаб вазиятлар яратдик ва қолган жиҳатларда ҳам ишончли ўйнадик. Биз олдинга ҳаракат қиляпмиз", — деди Франция терма жамоаси сардори.