Мбаппе бошчилигидаги ПСЖ 24 ўйиндан бери ютқазмаяпти!
- 18-март 2024, 04:14
- 0
- Футбол
Франция чемпионати доирасида бўлиб ўтган "Монпелье" - ПСЖ баҳсида меҳмонлар 2:6 ҳисобида ғалаба қозонди. Аҳамиятлиси, Париж гранди мазкур 3 очко эвазига ўзининг мағлубиятсиз сериясини 24 та ўйинга етказиб қўйди.
Килиан Мбаппе шериклари ноябрь ойидан бери ўтказилган 24 баҳснинг 17 тасида зафар қучган бўлса, яна 7 беллашув дуранг натижа билан якун топган. Луис Энрике шогирдлари охирги бор чемпионлар лигаси гуруҳ босқичи доирасида "Милан"га 1:2 ҳисобида ютқазиб қўйганди.
Маълумот ўрнида, айни пайт ПСЖ 59 очко билан Лига 1 турнир жадвалида яққол пешқадамлик қиляпти. 2-поғонадаги "Брест" билан орадаги фарқ 12 очкони ташкил этади.
Қўшимча қилиш мумкин, Париж клуби чемпионлар лигаси чорак финал босқичида Испаниянинг "Барселона" жамоаси билан куч синашади.