Матеус Лима Круз: Ўзбекистонда тўп тепаман, деб ўйлаб ҳам кўрмагандим. "Пахтакор"га қарши ўйин - жиддий синов! (интервью)

"Насаф" бу мавсум чемпионликка ҳар галгидан яқинроқ келмоқда. Клуб ҳозир чемпионликка даъвогар 3 жамоадан бири ҳисобланади. 

SPORTS.uz сайти "аждарлар" легионери Матеус Лима Круз билан боғланиб, лига чемпионлиги, "Пахтакор" билан ўйин ва бошқа мавзулар ҳақида унинг фикрлари билан қизиқди.

- Хайрли кун, Матеус! Асосий саволдан бошлаймиз. Нима учун "Насаф"ни танладингиз? 

- Сабаби, жамоа чемпионликни мақсад қилганди. Улар доим катта мақсадларни кўзлаб келишган. Шу сабаблар туфайли мен "Насаф"ни танладим.

- Бу клуб аъзоси бўлишдан мақсад нима эди?

- Мен жамоага ёрдам беришни истайман. Бу ерда ўзимни бахтли ҳис қилмоқдаман. Чунки бизда яхши жамоа, аҳиллик ва соғлом рақобат мавжуд.

- Ўзбекистонга келишдан олдин мамлакат ва унинг футболи ҳақида нималарни билардингиз? 

- Ривалдо юртингизда ўйнаганини билардим. Аммо ҳеч қачон Ўзбекистонда тўп тепаман, деб ўйлаб ҳам кўрмагандим. Шуни айта оламанки, мамлакатингизда футбол ўйнаш мен учун қувончли ҳол. 

- Охирги вақт асосий таркибда майдонга тушмаяпсиз. Бунга нима сабаб деб ўйлайсиз?

- Сабаби оддий. Бизда яхши жамоа бор. Ҳамма футболчилар муҳим аҳамиятга эга. Асосий таркибда ўйинни бошлаш ёки бошламаслик муҳим эмас. Асосийси, клуб учун борингни бера олишинг.

- Ўзбекистонда эътиборингизни тортган биринчи нарса нима бўлди?

- Одамлар жуда ҳиссиётга берилувчан ва дангал экан. Машғулот ва ўйинлар сабаб бошқа нарсаларни кўришга улгурмадим, афсуски. 

- "Пахтакор"га қарши ўйин ҳақида нима дея оласиз?

- Бу жуда муҳим ўйин. Мақсадга етишиш йўлида бизнинг илк жиддий синовимиз. Ўйин вақтида ҳар бир лаҳзага жиддий эътибор қаратишимиз керак. Шунда ғалаба қозона оламиз. 

- Суперлигада сизни ҳайрон қолдирган клуб қайси бўлди?

- Албатта, бизнинг клуб (кулади). Шунинг учун ҳам мен "Насаф"ни танлаганман. 

 

Шоҳрух Зоиров суҳбатлашди.