"Машъал" "Пахтакор"га қарши ўйинни бош мураббийсиз ўтказади...ми?

1 август куни Ўзбекистон Суперлигасида иккинчи даврага старт берилади. Биринчи даврани 12-ўринда якунлаган Муборакнинг "Машъал" клуби ҳам ўз режасига биноан ёзги тайёргарлигини давом эттиряпти.

Суперлиганинг навбатдаги турида мамлакатимизнинг етакчи жамоаларидан бири – "Пахтакор"га қарши баҳс олиб бориши кутилаётган Муборакнинг "Машъал" жамоаси ушбу учрашув олдидан тайёргарликни бошлаб юборди.

Отабек Нарзуллаев бошчилигида Муборакдаги клуб базасида машғулотларни бошлади. Мураббийлар штаби томонидан тайёрланган машғулот режаси жамоанинг жисмоний ҳолати ва тактик савиясини янада оширишга қаратилган.

Айниқса, яқинда жамоага қўшилган янги футболчиларнинг машғулотларга тезда мослашгани ва жамоа муҳитига сифатли тарзда сингиб кетгани қувонарли ҳол. Улар ўзини кўрсатишга интилмоқда ва бу жамоа ички рақобатини янада кучайтириши шубҳасиз, - дейилади клуб хабарида.

Жамоа руҳияти юқори, барча аъзолар бир мақсад йўлида жипс ҳаракат қилмоқда. “Машъал” мухлислари эса ўз жамоасидан муҳим учрашув арафасида кучли ва ғалаба учун чанқоқ ўйин кутишмоқда.

Бу вазиятда муҳим жиҳатлардан бири шундаки, "Машъал" бош мураббийсиз иккинчи даврага тайёргарлигини давом эттирмоқда. Олдин хабар бериб ўтганимиздек, Асрор Алиқулов оилавий сабабларга кўра айни пайтда жамоа билан бирга эмас. Шунинг учун мураббийлар штабида ишлаб келаётган Отабек Нарзуллаев жамоани вақтинча бошқаришда давом этмоқда ва у "Машъал"ни "Пахтакор" билан бўладиган ўйинга тайёрламоқда. Алиқулов 1 августга қадар жамоага қайтадими? Ҳозирча бу хусусида бир нима дейиш қийин. Балки қайтар, балки...

Албатта, муборакликлар иккинчи даврани муҳим ўйин билан бошлашади. Шу билан бирга рақиб мураккаб. "Машъал"да эндиликда "Пахтакор"ни енгиш салоҳияти қай даражада шаклланганини ўша ўйин куни кўрамиз. Ёзги тайёргарлик жараёнида таркибда ҳам ўзгаришлар юз берди. Лекин яна бир жиҳатни унутмаслик керакки, Алиқуловнинг йўқлиги футболчиларга қанчалик таъсир кўрсатаркин? 

Эслатиб ўтамиз, “Машъал” – “Пахтакор” учрашуви жорий йилнинг 1 август куни, Ғузор шаҳридаги “Шўртан” марказий стадионида бўлиб ўтади.