Манчестерликлар Шомуродов билан ўйнаган футболчини олади
- 4-декабр 2025, 07:08
- Zohir Toshxo’jayev
- 0
- Футбол
Англия Премьер-лигасидаги мавқеини тиклашга уринаётган “Манчестер Юнайтед” ёзги трансферлар ойнаси даврида “Рома”нинг ўнг қанот ҳимоячиси Зеки Челикни ўз сафига қўшиб олмоқчи.
Туркиялик футболчи Рим клубида Элдор Шомуродов билан бирга ўйнагани учун ўзбекистонлик мухлисларга жуда яхши таниш.
TEAMtalk нашрининг ёзишича, манчестерликлар 28 ёшли ўйинчини олиш учун “Ливерпуль” ва “Арсенал” каби қудратли клублар билан рақобатлашишига тўғри келмоқда.
Зеки Челикнинг “Рома” билан амалдаги шартномаси шу мавсум охирида якунига етади. Италия клуби ўйинчи билан ҳамкорликни узайтириш мақсадида унга янги битим таклиф қилмоқчи.
Бироқ ҳимоячининг ўзи қарор қабул қилишга шошилмаяпти. Челик январь ойида унга тушадиган таклифларни кўриб чиқишини билдирди.
Челик 2022 йилдан бери “Рома” таркибида ўйнамоқда. Жорий мавсумда у барча мусобақаларда 15 та ўйинда иштирок этиб, битта гол ва битта голли узатма билан ажралиб турди. Transfermarkt порталида келтирилган маълумотларга кўра, футболчининг бозор қиймати 6 миллион еврони ташкил этади.