“Манчестер Юнайтед” сўниб қолган қиммат юлдуздан қутилди

“Манчестер Юнайтед” раҳбарияти бразилиялик қанот ҳужумчиси Антонини вақтинчалик бошқа лигага қўйиб юборадиган бўлди.

24 ёшли футболчи фаолиятини ижара асосида Испания чемпионати вакили “Бетис”да давом эттиради. Бу ҳақида журналист Фабрицио Романо маълум қилди.

Манбага кўра, томонлар трансфер бўйича барча масалаларда келишувга эришган ва ҳужжатлар текширувдан ўтказилган. Ҳамкорлик 2025 йилнинг 30 июнигача давом этади. Битим бўйича испан клубида ўйинчини сотиб олиш ҳуқуқи йўқ.

Антонининг олти ойлик маошини ҳар икки клуб бўлиб тўлайдиган бўлди.

“Манчестер Юнайтед” истеъдодли ҳужумчини 2022 йилнинг ёзида 95 миллион еврога трансфер қилган эди. Бироқ Антони Англия чемпионатига мослаша олмади ва бора-бора асосий таркибдаги жойини йўқотди.

Transfermarkt портали 2027 йилнинг ярмигача давом этадиган шартномага эга футболчини 20 миллион еврога баҳоламоқда.