"Манчестер Сити" нега айнан Ҳусановни танлади?
- 16-январ 2025, 08:30
- Zohir Toshxo’jayev
- 1
- Футбол
Замонавий технология ютуқларидан бўлган сунъий интеллект кириб келмаган соҳа қолмади. Спортда, хусусан, футболда сунъий идрок имкониятларидан футболчилар ва жамоаларнинг нималарга қодирлигини аниқлашда фойдаланилмоқда.
Хусусан, тақдирини “Манчестер Сити” билан боғлашга қарор қилган Абдуқодир Ҳусановнинг ҳимоячи сифатидаги имкониятлари ва кўрсаткичлари сунъий идрок ёрдамида баҳоланди.
Марказий ҳимоячилар жамоа муваффақиятларида муҳим роль ўйнайди. Замонавий футболда уларнинг ҳимоядаги вазифалари қаторига жамоа ҳужумларини бошлаш талаби ҳам қўйилмоқда.
Хўш, Абдуқодир Ҳусановнинг кучли томонлари нималарда кўринади?
Умумий маълумот:
Амплуаси: марказий ҳимоячи
Асосий хусусиятлари: универсаллик, тезкорлик, узоқ масофаларга аниқ тўп узатиш орқали ҳужумларни бошлаб бериш қобилияти.
Жисмоний имкониятлари:
Ҳусанов жуда баланд сакрайди ва мукаммал координацияна эга, ҳаракатларини тўғри бошқара олади.
Абдуқодир катта бошланғич тезликка эга ва бу хусусияти орқали тезкор ҳужумчилар билан бемалол рақобатлашади.
Техник кўникмалари:
Ҳусанов бош билан ишончли ўйнайди, юқоридан келаётган тўпларни қайтаришга уста.
Абдуқодир тўпни узоқ масофага аниқ етказади, паслари орқали кўпинча жамоасининг қарши ҳужумларини бошлаб беради.
Ҳимоявий ҳаракатлар – тўпни эгаллаб олиш ва жарима майдончасидан узоқлаштиришда яхши кўрсаткичларни қайд этмоқда. Ҳусанов прессингда агрессив ўйнайди.
Ўйин тактикаси:
Универсал ўйин услубларини қўллайди, жамоаси ҳужумларига қўшилишни хуш кўради.
Уч ҳимоячили ва икки марказий ҳимоячили схемаларда ўйнай олади.
Ҳимоя чизиғининг ҳар қандай нуқтасида ўйнай олади.
Ҳусановнинг тактик маҳорати ҳимоядан ҳужумга тезкор ўтишда қўл келади.
Амалда:
Абдуқодир Ҳусанов клубида ҳам Ўзбекистон миллий терма жамоаси сафида ҳам динамикаси билан жамоавий ўйинга устунлик бағишлайди. У кўп қиррали ва тезкор ҳимоячи ҳисобланади. Бир неча позицияда ишончли ҳаракат қилиши мумкин. Энг муҳими, жамоа ҳужумларини бошлай олади, кучли ва аниқ зарбага эга, стандарт вазиятлардан фойдалана олади.