“Манчестер Сити” мухлислари Ҳусановни қандай қабул қилди?
- 23-январ 2025, 17:00
- Zohir Toshxo’jayev
- 0
- Футбол
Абдуқодир Ҳусановнинг “Манчестер Сити”га кўчиб ўтиши 2025 йилнинг энг шов-шувли трансферларидан бўлди, дейиш ҳеч қандай муболаға эмас.
Хосеп Гвардиола розилиги билан клубга таклиф этилган 20 ёшли ҳимоячи учун “шаҳарликлар” 50 миллион евро тўлагани бу трансфернинг аҳамиятидан далолат беради. Яқин келажакда ўзбек футболига алоқадор бунақа катта трансфер яна қачон амалга оширилиши даргумон.
Профессионал фаолиятини бошлаганидан бери Абдуқодир Ҳусанов аввал Беларусь, кейин эса Франциядаги мухлислар меҳрини, эҳтироми ва эътиборини қозониб келган. Ўзбекистонлик футбол ишқибозлари ҳар доим бу ўйинчини қўллаб-қувватлаб туради.
Энди навбат, замонавий футбол ватани Англиянинг талабчан фанатларига. Ҳозирча “Манчестер Сити” мухлисларининг ўзбек футболчисига бўлган муносабати жуда ижобий.
Sports.uz портали “Манчестер Сити” клуби мухлисларининг Абдуқодир Ҳусанов трансфери бўйича фикр-мулоҳазаларини ўзбекистонлик футбол ишқибозлари эътиборига ҳавола қилади.
Out of Contest Mich:
Ҳусановни дунёнинг энг зўр клубига келгани билан қутлаймиз!
Napaul:
Ҳусановнинг келиши билан жамоада қайта тикланиш бошлансин!
Szøbø:
Абдуқодир Премьер-лигада нималарга қодирлигини энди билиб оламиз...
D1Br7ne:
“Манчестер Сити”да янги эра бошланди
Vusumuzi Mazibuko:
Ҳусанов, хуш келибсан. Захирада ўтириб қолма!
Giddygiddy:
Биринчи ўйиндаёқ, бошланғич таркибга ўйнасин!
Leo:
“Манчестер Сити” янги ўйинчиларни ола бошлади. Ҳусанов хуш келибсан!
Hal Elance:
Манчестерликлар, бизнинг йигитимизни эҳтиёт қилинглар. Тез орада у жаҳон футболчининг энг зўр марказий ҳимоячисига айланади.
Kaptain Kush:
Ҳусанов “Манчестер Сити”нинг дунёнинг энг зўр клуби эканини билган ҳолда келган!
Ismael Mansoor:
Бу ёш ҳимоячи ҳали “Манчестер Сити” учун жуда зўр ўйинчига айланади. Бу йигит янги клубида нималарга қодирлигини кўрсатишини интизорлик билан кутяпмиз.
Эслатиб ўтамиз, “Манчестер Сити” Абдуқодир Ҳусанов билан 2029 йилнинг ярмигача давом этадиган шартнома имзолади ва томонлар ўзаро келишган ҳолда ҳамкорликни яна бир йилга узайтириши мумкин. Легионеримиз янги жамоасида 45-рақамни танлаган.