"Манчестер Сити" Гвардиолнинг жароҳати бўйича маълумот берди

"Манчестер Сити" Йошко Гвардиолнинг ўнг оёғида болдир суяги синдирганини тасдиқлади.

Мазкур жароҳат "Челси"га қарши бўлиб ўтган 1:1 ҳисобидаги ўйиннинг иккинчи таймида юз берган. Маълумот ўрнида, хорватиялик футболчи 50-дақиқада жароҳат олиб, алмаштирилди. Унинг ўрнига эса ҳамюртимиз Абдуқодир Ҳусанов захирадан ўйинга қўшилди.

Ҳимоячи ҳафта давомида жарроҳлик амалиётини ўтказади ва жароҳатнинг тўлиқ кўлами ҳамда тахмин қилинган даволаш муддати ҳозирда баҳоланмоқда.

Маълумот ўрнида, "шаҳарликлар" навбатдаги учрашувини 7 январь куни "Брайтон"га қарши ўтказади. Гвардиолнинг йўқлиги боис, вакилимизнинг майдонга тушиш эҳтимоли юқорироқ.