Лутфулла Тўраев: "Бўлди, "Нефтчи"да 13-рақамда ҳеч ким ўйнамайди" (2-қисм)

Бу йилдан футболчилик фаолиятига нуқта қўйган ва мураббийликда дастлабки қадамларини қўяётган Лутфулла Тўраев Sports.uz журналистига интервью берди. Куни кеча унинг биринчи қисмини ҳавола қилгандик. Бу сафар эса суҳбатнинг иккинчи якуний қисмини тақдим этамиз.

- Бу йил “Навбаҳор”, “Нефтчи” ва “Насаф”ни асосий фаворит сифатида кўришмоқда. Қандай интрига кутяпсиз ҳамда жамоангизнинг имконияти борасида нима дея оласиз?

- Янги мураббий келганидан кейин 11-ўриндан 8-поғонада тугатилди. Масалан, ўтган йили ҳам бирортаси бизга мана бу ўринни оласан деб мақсад қўймаганди. Жамоада учинчи йил кетяпти ва бу сафар энди мураббийлар штабига қўшилдим. Барибир вилоят ҳокими томонидан аниқ мақсад қўйилади. Чемпионатни сафардаги учрашувда бошлашимиз туфайли ҳоким билан учрашув бўлмай қолди. Ўйлашимча, мақсадни бош мураббийга етказади ва кейин футболчиларга. Барча йигитлар ҳам нима учун бу ерга йиғилишганини тушуниб туришибди. Ўйлашимча, бу йил қизиқ бўлади. “Насаф”, “Навбаҳор”, “Нефтчи”, ОКМК, “Пахтакор” ғолиблик учун курашади.

- “Нефтчи”ни чемпионликка эришишига шубҳангиз йўқми?

- Бу футбол. Майдон текис, тўп думалоқ. Ҳамма нарса бўлиши мумкин. Биз қўлимиздан келганича максимал ҳаракат қиламиз. Қолгани Худодан.

- Фаворитлар қаторига бу йил “Пахтакор”ни қўшмаётганлар бисёр...

- Барибир “Пахтакор” кучли жамоа. Нима бўлишидан қаътий назар яхши жамоа, номи бор. Улар ҳам ҳаракат қилади. Кўплари кетган бўлса ҳам иқтидорли футболчиларига эга. Жиддий курашишади.  

- Чемпионатимизда сизни позициянгизда ўйнайдиган футболчилар орасида энг ёқадигани ким?

- Яхши ўйинчилар бор. “Олимпик”да Абдурауф Бўриевни айтишим мумкин. U20 терма жамоамиз аъзоси, “Пахтакор” футболчиси Асқаров ҳам бор. Кейин Умарали Раҳмоналиев ҳам ўртада ўйнайди. Ажойиб футболчи.

- Сизга ҳеч Европадан ҳам таклиф бўлганми?

- Бўлмагану, аммо Россияга боришим мумкин эди. Кейин Эронга ҳам чақиришган. 29 ёшимда Малайзияга кетганман. 

- Агар сизда бошқатдан танлаш имконияти бўлганида нимани ўзгартирган бўлардингиз?

- Шундай имконият бўлганида мен Малайзияга 25-26 ёшимда кетган бўлардим.

- Сабаб?!

- У ерда футбол кучсизроқ бўлгани билан футбол атрофидаги ташкилотчилик бизникидан кучли эди. 2015 йили декабрь ойида Улуғбек Мирзаев билан укаси Баҳодир Мирзаев Малайзияда финалга келишган. Стадионда ҳаммасини ўз кўзлари билан кўришган, муҳитни ҳис қилишган.

- Бу йил ўзимиздаги Суперлигамиз интригасини қандай баҳолайсиз?

- Яхши бўлади. Масалан, “Бунёдкор”да хорватиялик янги мураббий иш бошлади. Европа футболини олиб кирмоқчи ва буни ўйинчиларига сингдирса бошқача футбол бўлади. “Динамо” Вадим Абрамов бошчилигида рақобатбардош жамоага айланади. Бошкович “Сўғдиёна”да яхши натижа кўрсатиши мумкин. Бу йил ўтган йилгидан ҳам қизиқ бўлади.

- Терма жамоамизни Осиё Кубогидаги иштирокига муносабатингиз қандай ва жаҳон чемпионатига қачон чиқамиз, деб ўйлайсиз?

- Ҳамма жароҳат кўп бўлди, деб айтишмоқда. Бироқ ҳаммаси ўз қўлимизда эди. Пенальтилар лотереяси бу 50х50. Жаҳон чемпионатига келсак, хўп мундиалга чиқдик, ҳам дейлик, кейинчи, 4-5 тадан гол ўтказиб яна қайтиб келамизми? Кейинги жаҳон чемпионатига чиқишга ҳаракат қиламиз, тўғрими? Нима ўзгаради? У ерга боргандан кейин муносиб иштирок этиш керакми? Пастдан, болалар футболидан тизимни тўғрилаб, олиб чиқиб бориш керак. Аввало, академияларни тартибга солиш лозим. Тизим ҳамма жойда бор нарса. Саудия Арабистони, Япония, Жанубий Корея, Эрон сингари терма жамоалар ўзидан-ўзи жаҳон чемпионатига чиқиб қолишмаган.  

- Сизни доим 13-рақамда кўриб одатланганмиз. Лекин кўпчилик футболчилар бу рақамда тўп суришни ёқтиришмайди...

- Ёшлигимдан 13 ни олиб ўрганиб қолганман. Ҳазиллашиб, бу рақам ҳеч кимга керак эмас, шунинг учун 13 ни оламан деб айтардим. Ирим-сиримларга ишонмайман.

- Ҳозир “Нефтчи”да ким 13-рақамни олди?

- Ҳеч ким. Бўлди, “Нефтчи”да 13-рақамда ҳеч ким ўйнамайди (кулади), ҳазил.

- Фарғоналик ишқибозлар қандай гапингиз бор?

- Улар зўр, гап бўлиши мумкин эмас. Фарғона, Андижон ва Наманган ишқибозларига қойил. Ўйинларга келиб бизни руҳимизни кўтариб, мухлислик қилишса қўлимиздан келганича уларни хурсанд этишга ҳаракат қиламиз.

Шуҳратбек Жўраев.

Лутфулла Тўраев: "Мураббийликка қадам босдингизми, сиз ўзгаришингиз керак" (1-қисм)