Легионеримиз Италияда ўйнай оладиган футболчи борлигини айтди
- 6-ноябр 2024, 08:01
- Zohir Toshxo’jayev
- 0
- Футбол
Ўзбекистон миллий терма жамоаси марказий ҳимоячиси Рустам Ашурматов 2023 йилнинг бошидан бери Россиянинг “Рубин” клуби шарафини ҳимоя қилиб келмоқда.
28 ёшли футболчимиз россиялик журналистлар билан суҳбатда жамоадоши Мирлинд Даку ҳақидаги саволларга ҳам жавоб берди.
— Даку кейинги пайтда нега гол уролмай қолди?
— Биз кўпроқ ҳимоядан ўйнашга ўтдик. Шу боис унга олдинги чизиқда якка ўзи қолиб кетиб, гол уришга қийналяпти.
Бундан ташқари, у ҳозир мураккаб жараёнларни бошдан ўтказяпти, дейишимиз мумкин. Лекин биз унга гол уриши учун ёрдам берамиз.
— Бош мураббий Рашид Раҳимов Дакуга А Серия клублари қизиқиш билдирганини айтди. Бунга унинг савияси етадими?
— Мирлинд — сифатли ўйинчи. Албатта, у Италияда ўйнай олади. Лекин айни пайтда у келажакда нима қилмоқчи эканини билмаймиз.
“Рубин” клуби ҳужум чизиғини кучайтириш мақсадида Мирлинд Дакуни 2023 йилнинг ёзида Хорватиянинг “Осиек” жамоасидан 1,2 миллион евро эвазига трансфер қилган эди.
Даку Россияга келганидан кейин “Рубин” сафида жами 46 та учрашувда иштирок этиб, рақиблар дарвозасини 16 маротаба ишғол қилди ва жамоадошларига еттита голли пас узатди.
Жорий мавсумда Даку Россия Премьер-лигасининг дастлабки олтита турида бешта гол уриб, мухлису мутахассислар эътиборини ўзига қаратган эди. Кейинчалик унинг самарадорлиги тўхтади ва қолган саккизта баҳсда ўз ҳисобига атиги битта гол ёздириб қўйди холос.
Даку фаолиятининг катта қисмини Косово, Албания, Хорватия ва Словениянинг турли клубларида ўтказди. Халқаро миқёсда 2023 йилнинг сентярь ойидан бери Албания терма жамоаси шарафини ҳимоя қилиб келмоқда. Ҳозирча саккизта учрашувда қатнашиб, бир маротаба гол урди.
“Рубин”нинг етакчи ҳимоячиларидан ҳисобланган Рустам Ашурматов Қозон шаҳрига 2023 йилнинг январида кўчиб борган. Рустам Ашурматов ярим мавсум давомида қозонликларнинг Премьер-лигага йўлланма олишига ёрдам берган. Ўша йили “Рубин” биринчи лига ғолиби сифатида юқори дивизионга чиқди.
Ашурматов “Рубин” сафида жами 38 та учрашувда иштирок этиб, рақиблар дарвозасини уч маротаба ишғол ҳам қилган.
Тажрибали марказий ҳимоячимиз Россияга боргунга қадар юртимизда “Бунёдкор”, “Қўқон -1912”, “Навбаҳор”, Жанубий Кореяда “Гвангжу” ва “Канвон” каби клублар шарафини ҳимоя қилган.
Рустамжон 2017 йилдан бери Ўзбекистон миллий терма жамоаси ўйинчиси ҳисобланади. Ҳозиргача 38 та учрашувда майдонга тушган. Ҳимоядаги вазифаларини бажаришдан ташқари ўз ҳисобига битта гол ҳам ёздириб қўйган.
Ашурматовнинг “Рубин” билан амалдаги шартномаси 2026 йилннг 30 июнига қадар давом этади.