Легионер бўлиш осон эмас. Ўрунов қаерда хато қилганди?
- 3-август 2024, 20:00
- Zohir Toshxo’jayev
- 0
- Футбол
Остон Ўрунов Ўзбекистоннинг энг истеъдодли ўйинчиларидан бири ҳисобланади. Бироқ ҳужумкор футболчининг легионер сифатида илк тажрибаси омадли бошланиб, кейинчалик муваффақиятсизликка юз тутган.
Ўзбек ва Осиё футболини яхши биладиган россиялик мутахассис Александр Крестинин Остон Ўрунов нега унинг юртида ўйнаб кета олмаганини тушунтириб берди.
Ҳозир Крестинин Ўзбекистон Суперлигасида ишлаяпти. У Тошкентнинг “Локомотив” жамоаси бош мураббийи ҳисобланади.
- Масаланинг ички моҳиятини билмайман, лекин Ўруновнинг ўйинлари ва мутахассислар берган маълумотларга қараганда, Остон индивидуал ҳаракатлари ва жамоавий ўйинда ўзаро мувофиқликни таъминлай олмаган.
Ўрунов индивидуал жиҳатдан кучли футболчи, лекин унга жамоада ўзини кўрсатиши учун талаб қилинадиган баланс етишмади.
Остонни ўзининг ўйин услубини жамоага интеграция қилиш учун олишган эди, бироқ “Спартак”да ҳам, бошқа жамоаларда ҳам бу иш бермади.
Буёғини кузатиш керак. Ҳозир Остон яхши чемпионатга кетган ва кейинчалик нима бўлишини вақт кўрсатади. Бироқ у бўлиб ўтган воқеалардан хулоса чиқаргани, ўзи тушган вазиятни ўйлаб кўргани аниқ. Ҳали ёш, ҳаммаси олдинда, - деди Александр Крестинин.
Остон Ўрунов – “Пахтакор”нинг энг иқтидорли тарбияланувчиларидан ҳисобланади. Лекин профессионал футболчилик фаолиятини “Навбаҳор”да бошлаган. Намангандаги фаолиятида ўсишга эришган ўйинчи 2019 йилнинг ёзида Тошкентнинг “Локомотив” жамоасига кўчиб ўтди.
Ҳужумкор футболчи пойтахтликлар сафида узоқ қолмади. 2020 йилнинг бошида Россия Премьер-лигаси вакили “Уфа” уни олиб кетди.
Россия чемпионатининг иккинчи қисмидан қўшилган Ўрунов қисқа фурсатда “Уфа”нинг етакчи ўйинчиларидан бирига айланди. Ёзда уфаликлар бош директори Шамиль Газизов “Спартак” раҳбарларидан бирига айланди.
Ўруновни “Уфа”га олиб кетган бу мутасадди кўплаб қизиқишлар бўлишига қарамай, Остонни энди “Спартак”га жойлади.
Кейинчалик Газизовнинг пойтахт клуби раҳбарлари билан келиша олмай қолиши, Ўруновнинг ҳам фаолиятига таъсир қилди. Легионеримиз “Уфа”га ижарага жўнатилди. Кейин москваликлар шартномани бекор қилди.
Остон “Урал” жамоасидан қўним топди. Лекин янги иш жойида бош мураббий билан келиша олмагани ортидан у ердан ҳам кетди.
Ўрунов 2023 йилнинг бошида фаолиятини тиклаш учун “Навбаҳор”га қайтиб келди. Наманганда яна ўз ўйинини топди. Натижада терма жамоага жалб қилинди. 2024 йилнинг январида Қатарда бўлиб ўтган Осиё кубогидаги сермазмун ўйинидан кейин Остонни “Персеполис” ўз сафига қўшиб олди.
Ўруновнинг Эрондаги ишлари юришиб кетди. 23 ёшли футболчимиз Эрон Профессионал лигасида 13 та учрашувда олтита гол уриб, жамоасининг мамлакат чемпионлигини қўлга киритишига катта ҳисса қўшди.