Лапортанинг маслаҳатчиси ҳакамнинг қароридан норози

"Барселона" президенти Жоан Лапортанинг маслаҳатчиси Энрик Масипнинг фикрича, жамоа Испания Кубоги финалида 2 та пенальти тепишга ҳақли эди.

Ўйиннинг 43-дақиқасида "Барса" ярим ҳимоячиси Дани Ольмо бурчакдан тўп узатганда, тўп учун Пау Кубарси ва Дани Себальос курашаётган эди. Кубарси тўпни "Реал" дарвозасининг бўш қисмига киритиши мумкин эди, бироқ, Себальос билан курашда йиқилди. Ҳакам Рикардо де Бургос Бенгоэчеа бу ҳолатда қоида бузилишини кўрмади.

Иккинчи бўлимга қўшилган 4-дақиқада мадридликлар ҳимоячиси Антонио Рюдигер жарима майдонида "Барса" ҳужумчиси Ферран Торреснинг оёғига тепди. Торрес майдонга йиқилди. Бош ҳакам бу ҳолатда ҳам қоидабузарликни қайд этмади.

- Менинг назаримда, иккита пенальти берилиши керак эди. Феррандаги пенальти менга аниқ кўринди, иккинчиси эса Кубарсининг ушлаб олиниши эди.

Финал атрофидаги барча баҳслар фонида унинг ўн бир метрлик жарима тўпи билан якунланишини ким ҳам тасаввур қила оларди? - деди президент маслаҳатчиси.

Маълумот учун, Испания кубогининг финал баҳсида "Барселона" 3:2 ҳисобида "Реал Мадрид"ни мағлуб этди ва турнир ғолибига айланди.