“Ланс” Ҳусановнинг жойини кўрсатди!
- 11-август 2023, 08:32
- Zohir Toshxo’jayev
- 0
- Футбол
Ўтган мавсумда ПСЖдан бир очко ортда қолиб, иккинчи ўрин билан чекланган “Ланс” янги мавсумда чемпионлик учун курашмоқчи. Бош мураббий Франк Хейз шогирдларини Париж суперклуби билан юзма-юз рақобатга тайёрлади.
“Ланс” мураббийлар штаби 2023-2024 йилги мавсумда асосий таркибга қабул қилинган футболчилар рўйхатини эълон қилди. Лансликлар Франция чемпионати, мамлакат кубоги ва Европ Чемпионлар лигасида юқори мақсадлар учун курашади.
Дарвозабонлар:
29 ёшли Брис Самба “Ланс”га келганидан бир йил ўтиб, асосий дарвозабон мақомини олди. Самба янги мавсумда ҳам дарвозани ўзи қўриқлайди. Унинг ўринбосари сифатида Жан-Луи Река, Янник Пандор қайд этилган. Вуилькер Фариньес эса, ҳали оғир жароҳатдан қутилгани йўқ.
Ҳимоячилар:
Италия чемпиони – “Наполи” сафига кўчиб ўтмаган Кевин Дансо “Ланс” билан шартномасини узайтирди ва келаси мавсум ҳам жамоасига ёрдам беришга тайёр. У билан бир қаторда Факундо Медина ва Жоната Градит ҳимоя учлиги сифатида ўйнайди. Универсал Массадио Хайдара ва чап қанот ҳимоячиси Дейвер Мачадо ҳам ўзаро алмашиб ўйнаши кутилмоқда.
Ўнг томонда Франк Хейз Пшемислав Франковскига таяниши мумкин.
Кўпчиликни янги ҳимоячи – Абдуқодир Ҳусанов қизиқтирмоқда. 19 ёшли футболчининг салоҳияти Франк Хейз томонидан юқори баҳоланди. Мураббийлар штаби ҳамюртимизни асосий таркиб ўйинчилари қаторга қўшди ва мусобақаларда унинг хизматидан фойдаланади.
Ҳимоячилар таркибида шунингдек, Жюльен ле Кардинал, Стивен Фортес ва Жимми Кабо бор.
Ярим ҳимоячилар:
Кейинг мавсумларда “Ланс”нинг асосий фигураси бўлган Секо Фофана клубни тарк этган. Мураббийлар штаби унинг вазифаларини Энди Диуфга юкламоқчи. Унга майдон марказини ушлашда Салис Абдул Самед ёрдам беради. Стейн Спирингс ва Нил Ал-Айнауи ҳам янги мавсумда асосий ролларда бўлади.
“Ланс” ўтган йили ижара асосида ўйнаб, мавсум тугаши билан “Ницца”га қайтган Алекс Клод-Морис ўрнини босишга қодир плеймейкер топа олмади. Энди раҳбарият Давид Перейра да Кошта аввалги даражасига кўтарилишига умид қилмоқда.
Анжело Фульжини, Адриен Томассон, Лукаш Пореба, Мамаду Камара, Нолан Бонте, асосан захиралари ўйинчилари ҳисобланади ва ўзларига бериладиган имкониятдан фойдаланиб қолишга уринади.
Ҳужумчилар:
Ўтган мавсумдаги Лоис Опенданинг йўқлиги анчагача билинади. Клуб ҳали Опенда даражасидаги ҳужумчини трансфер қила олгани йўқ. Ҳозир ҳолатда Франк Хейз Морган Гилавогига таянади. Ҳужумкор футболчилардан Аянда Сишуба ва Оскар Кортес ҳам кўпроқ ўйин амалиётига эга бўлиши кутилмоқда. Олдинги чизиқдаги асосий вазифалардан бири “Манчестер Юнайтед”га гол урган Флориан Сотокага юкланади.
Шунингдек, ҳужумкор футболчилардан Уэсли Саиднинг жароҳати ҳали тузалгани йўқ. Ибраима Бальде захирадаги форвард сифатида ўз вақтини кутади.
“Ланс” Франция чемпионатидаги биринчи учрашувини 13 август куни сафарда “Брест” жамоасига қарши ўтказади.