Кўпчилик бошқа истеъфони кутаётганди-а? Ёхуд Шуҳрат Мақсудов нега "Бунёдкор"га "сиғмай" қолди?

Ҳар бир мураббий учун истеъфо сўзи ёнма-ён. Шунинг учун ҳар қандай жамоа бош мураббийи эгаллаб турган ўрни кафолатланмаганлигини яхши билади. Уларнинг тақдири натижага қараб белгиланади. Ушбу мақола ёзилишига сабаб бўладиган ҳолат юз берди.

Гап шундаки, Суперлиганинг 8-турида “Бунёдкор” клуби ўз майдонида “Металлург”ни қабул қилиб, 1:1 ҳисобида дуранг ўйнади. Аксига олиб, меҳмонлар 10 киши бўлиб қолганди. Умарали Раҳмоналиев “Бунёдкор”ни ҳисобда олдинга олиб чиққанига қарамасдан, бекободликлар 67-дақиқада Дамир Темиров томонидан киритилган гол эвазига мағлубиятдан қутилиб қолди. Қизиғи, 46-дақиқада Шоҳназар Норбеков қизил карточка туфайли майдонни тарк этиб, “Металлург”ни қийин аҳволга солиб қўйганди. Лекин якунда томонларнинг кучи тенг келди. Табиийки, “Бунёдкор”нинг сон жиҳатдан устун бўла туриб ғалаба қозона олмагани раҳбариятни ҳам, мухлисларни ҳам ва мураббийларни ҳам ранжитгани турган гап. Шу сабабли, қайд этилган дуранг “қалдирғочлар” учун қониқарсиз натижа бўлди. Учрашувдан сўнг мураббий матбуот анжуманида футболчиларнинг ўйинидан умуман қониқмаганини очиқ айтди. Наманганда “Навбаҳор”га қарши баҳс билан солиштирганда ер билан осмонча фарқи бўлганини эътироф этди. Аммо учрашувнинг эртасига бош мураббий Шуҳрат Мақсудовнинг ишдан бўшатилиши фонида воқеалар ривожи бироз тезлашиб кетгандек таассурот қолдирди.

Шу тариқа, чемпионатимиздаги илк истеъфо 8-турга тўғри келди. Ўтган йили 1-турдан кейиноқ, “Навбаҳор” Нўъмон Ҳасановни бош мураббийликдан бўшатиб юборгани ёдимизда қолган. Бу йил эса илк истеъфо Мақсудовга тегишли бўлди. Хўш, аслида ҳаммаси қандай содир бўлди? Мураббий “Бунёдкор”дан истеъфога чиқарилишга лойиқмиди? Аввало масаланинг шу моҳиятига эътибор қаратсак мақсадга мувофиқ бўларди. “Бунёдкор” ҳозир қайси ўринда? Кечаги дурангдан кейин 6-ўринда. 8 та учрашувда 3 та ғалаба, 2 та дуранг ва 3 мағлубият қайд этилди. Фақат охирги 3 та турда 2 мағлубият ва 1 дуранг ўйнашди. Қизиқ, Шуҳрат Мақсудов чиндан ҳам истеъфога чиқишга лойиқмиди? Рости, бу билан мураббийни ёнини олиш фикридан мутлақо йироқмиз. Шунчаки, вазиятга холисона баҳо беришга интиляпмиз. Бу йил қандай таркиб йиғди? Ўтган йилги таркибдан кимлар кетди? Масаланинг шу томонига ҳам эътибор қаратиш адолатдан бўларди, бизнингча. Етакчи ўйинчиларини сақлаб қола олмади, кўплаб футболчилар кетиб қолди ва асосий эътибор маҳаллий тарбияланувчиларига қаратилди. Эшитишимизга қараганда, мавсум аввалида мураббийга ушбу таркибни шакллантириши учун бир йил вақт берилган. Лекин бир йилни кутишмади ва 8 та турдан кейиноқ унга чиқиш эшикларини кўрсатиб қўйишди.

Мақсудов бир неча бор матбуот анжуманларида қиммат ўйинчиларни сотиб олмасдан, асосий эътибор клуб тарбияланувчиларига қаратилаётганини айтганди. Аслида ҳар қандай мураббий ҳам таркибида тажрибали футболчилар бўлишини истайди. Чунки шу орқали кўзлаган натижага эришиш нисбатан осонроқ кечади. Бироқ “Бунёдкор”да бундай имконият бўлмади. Тўғри, айрим ўйинчилар таклиф қилинди. Лекин трансфер бозорида клуб шов-шув уйғотмади. Чўнтагига яраша футболчиларни олди. Агар шунга яраша натижа ўта салбий бўлганида ҳам вазиятни тушунардик. Шундай экан, у истеъфога чиқишга лойиқмиди? Тўғри, оғир мағлубият бўлди. 6-турда “Бунёдкор” ўз майдонида “Олимпик”ни қабул қилди ва 1:5 ҳисобида кутилмаган мағлубиятни қабул қилиб олишига тўғри келди.

Очиғи, чемпионатдаги илк истеъфо сифатида бошқа мутахассис номи кўпроқ айтилаётганди-а? Ҳеч кимга сир эмас, “Нефтчи”нинг салбий натижалари туфайли Илҳом Мўминжоновнинг лавозимидан озод этилиши бўйича гап-сўзлар тарқалди. Бугунги кунда “Нефтчи” турнир жадвалида яққол аутсайдер бўлиб турибди. Жамоа илк турда ғалаба қозонган. Шундан бери ютолмаяпти, кетма-кет мағлубиятлар қайд этмоқда. Мана шундай салбий натижалар сабабли кўпчилик илк истеъфо айнан Мўминжонов билан содир бўлади, деб турган бир вазиятда жамоаси билан юқорироқ поғоналардан бирида бораётган Шуҳрат Мақсудов ишсиз қолди. “Бунёдкор” клуби уни “ҳайдаб” қанчалик тўғри ёки нотўғри йўл тутганини мавсум давомида билиб оламиз.