Компани: "Ҳозирча ҳаммаси идеал эмас, лекин ёмон ҳам эмас"

"Бавария" бош мураббийи Венсан Компани 2-турда "Аугсбург"га қарши (3:2) баҳсдан сўнг фикр билдирди.

"Бугун яна кўп вазиятларни йўқотдик. Биринчи бўлим яхши ўтди, иккинчиси унчалик эмас. Ҳозирча барча жиҳатда идеал эмасмиз, лекин вазиятга қараш керак – тайёргарлик учун қисқа вақт бўлди, таътил ҳам қисқа кечди. 7 та ўйин ўтказдик ва уларнинг барчасини ютдик, жумладан 3 та сафарда.

Тўпга эгалик қилдик, рақибга кўп имконият бермадик. Лекин айрим вазиятларда хотиржамликни сақлаб, ташаббусни қўлдан бой бермаслик зарур.

Шунга қарамай, бугун 9 та аъло даражадаги гол уриш имкониятини яратдик. Қайси жиҳатларда ишлашимиз кераклигини биламиз", – дея таъриф бериб ўтди бельгиялик мутахассис.