Ким тезкор: Шомуродов ёки Дибала? (фото)
- 12-декабр 2024, 22:33
- Zohir Toshxo’jayev
- 0
- Футбол
Элдор Шомуродов жорий мавсумда Европа кубокларида иштирок этаётган ягона ўзбек футболчиси ҳисобланади.
Қозоғистоннинг “Ордабаси” жамоасидаги Шаҳбоз Умаров ва Жасурбек Яхшибоев ҳам, “Ланс” юлдузига айланган Абдуқодир Ҳусанов ҳам УЕФА таснифидаги Чемпионлар лигаси ва Конференциялар лигаси каби нуфузли мусобақаларни эрта босқичларда тарк этиб бўлган.
Фақатгина Элдор Шомуродов “Рома”да қолгани муносабати билан “бўрилар” сафида Европа лигаси умумий босқичда иштирок этиб келмоқда.
“Рома” қитъа миқёсидаги мусобақада анча камтар натижаларни қайд этмоқда. Пойтахтликлар бешта ўйиндан фақат биттасида ғалаба қозонган, уч маротаба дуранг ўйнаб, бир бор имкониятни бой берган.
Ҳозирча, римликлар олтинчи тур олдидан беш очко билан умумий жадвалда 36 та жамоа орасида 21-поғонада бормоқда.
Бош мураббийликка Клаудио Раньери тайинланганидан кейин жамоа ўйинида ижобий ўзгаришлар кўзга ташлана бошлади. Тажрибали мутахассис шогирдларини Португалиянинг “Брага” жамоасига қарши ўйинга пухта тайёрлади.
Римликлар Европа лигасидаги ўйин қайдномасига 24 нафар футболчини киритди. Рўйхат билан қуйида танишиш мумкин.
Элдор Шомуродов ҳам бўлажак учрашувга тайёрланмоқда. Жароҳатидан қутилганидан кейин легионеримиз юқори спорт формасини тиклашга ҳаракат қиляпти. 29 ёшли ҳужумчимизнинг машғулотларда қандай маҳнат қилаётганини қуйидаги суратлардан кўриб олиш имкони бор.
Ҳамюртимиз Европа лигасидаги бешта ўйиндан тўрттасида иштирок этди. Швециянинг “Эльфсборг” ва Бельгиянинг “Юнион” жамоаларига қарши ўтказилган баҳсларда бошланғич таркибда майдонга тушган бўлса, Испаниянинг “Атлетико” ва Украинанинг “Динамо Киев” клубларига қарши баҳсларда захирадан ўйинга қўшилди. Жами 166 дақиқа ҳаракат қилган ҳужумчисимиз халқаро турнирда ҳали ўзини кўрсата олгани йўқ.
Шомуродов А Серияда камроқ кўпроқ майдонга тушган бўлса-да, ўйин вақти жиҳатидан камроқ ўйнаган. Етти бор кўриниш берган ҳамюртимиз чемпионат доирасида 107 дақиқа тўп тепган. Шунга қарамай, биттадан гол ва ассист муаллифи бўлди.
“Рома” ва “Брага” ўртасида “Олимпико” стадионида бўладиган учрашув 12 декабрь куни Тошкент вақти билан 22:45 да бошланади.