Калафиори: "Энди биз кейинги босқичдамиз ва охиригача борамиз!"

Италия терма жамоаси ҳимоячиси Риккардо Калафиори "Евро-2024" учинчи туридан ўрин олган Хорватияга қарши ўйиндан кейин ўз фикрларини билдириб ўтди.

"Албатта, мен учун буюк натижалардан бири. Кейинги босқичжаги илк ўйинни ўтказиб юборсамда, жамоам плей-офф йўлланмасини қўлга киритганидан хурсандман. Бугун биз энг яхши ўйинимизни намойиш этдик, айниқса, иккинчи таймда. Биз масъулиятни жуда яхши ҳис қилиб тургандик ва якунда мақсадимизга етдик. Кейинги босқичга ҳақли эканлигимизни бошқаларга қараганда кўпроқ исботлаб қўйдик.

Жамоадошларимдан узр сўрайман, чунки кейинги ўйинда майдонга тушмайман. Аммо чорак финалда қайтаман. Италия ҳимоясининг муҳим бўғинига айланганим, мен учун катта бахт. Мураббий ҳам бизга ажойиб кўрсатмалар берди ва биз ўйинни ўз томонимизга оғдира олдик. Бизга қандай қилиб бўлмасин натижага эришиш кераклиги уқтирилди ҳамда биз буни уддаладик.

Шахсан мен учун ўзимни тиклаб олиш учун ажойиб сабаб бўлди, Испанияга қарши ўйиндаги автоголимни унутиш жуда муҳим эди. Хуллас, биз кейинги босқичдамиз ва охиригача борамиз", - деди Калафиори.

Эслатиб ўтамиз, Италия "Евро-2024" учинчи туридан ўрин олган баҳсда Хорватия билан 1:1 ҳисобида дуранг қайд этди ва кейинги босқичга йўл олди.