Жота ва унинг укасини дафн маросими бўлиб ўтди

"Ливерпуль"нинг вафот этган футболчиси Диогу Жотанинг дафн маросими бўлиб ўтди.

"Ливерпуль" ва Португалия терма жамоаси ҳужумчиси, шунингдек, унинг Португалия иккинчи лигаси вакили "Пенафиэл" сафида тўп сурган укаси Андре Тейшейра да Силва Испанияда ЙТҲда вафот этди. Маълум қилинишича, Жотанинг автомобили шинаси ёрилиб, йўлдан чиқиб кетган ва ёниб кетган.

Бугун футболчиларнинг дафн маросими ўз она шаҳри Гондомар шаҳрида бўлиб ўтди. Хотира маросими бир соатча давом этди.

Дафн маросимида футболчиларнинг оила аъзолари, дўстлари, жамоадошлари ва мураббийлари иштирок этди.

Дафн маросимидаги футболчилардан Виржил ван Дейк, Эндрю Робертсон, Жордан Хендерсон, Фабиньо, Тиаго Алкантара, Руй Патрисиу, Бернарду Силва, Бруно Фернандеш, Жоау Феликс, Жозе Фонте, Ренату Вейга, Рикардо ва Андре Орта ва бошқалар бор эди. Жоау Канселу ва Рубен Невеш клублар ўртасидаги жаҳон чемпионатида "Ал-Ҳилол" "Флуминенсе"га мағлуб бўлганидан сўнг дарҳол АҚШдан учиб келишди. Жотанинг укаси тўп сурган Португалиянинг иккинчи лигаси вакили "Пенафиэл" футболчилари тўлиқ таркибда етиб келишди.

Дафн маросимида мураббийлар ва функционерлардан Арне Слот, Фернанду Сантуш, Нуну Эшпириту Санту, Роберто Мартинес, Андре Виллаш-Боаш бор эди.

Ван Дейк хотирлаш маросимида Жотага аталган 20-рақамли гулчамбарни, Робертсон эса Силва учун 30-рақамли гулчамбарни олиб борди.

 Жотанинг тобутини кўтарганлардан бириб унинг яқин дўсти Рубен Невеш бўлди.