ЖЧ-2026 саралаши учун "CAFA Nation's Cup"даги чемпионлик жуда муҳим! Негалигини кичик матнда изоҳлаймиз!

Хабарингиз бор, 10-20 июнь кунлари илк бор "CAFA Nation's Cup” мусобақаси бўлиб ўтади. Бу турнирни барча ҳар ҳил қабул қилмоқда. Кимдир уни интизорлик билан кутаётган бўлса, яна ким учундир ўртоқлик учрашувидан фарқ қилмайдиган 3-4 баҳс ўрнида қабул қилинди. Хўш, аслидачи?

Мусобақанинг аҳамияти ҳақида ортиқча тўхталмоқчи эмасман. Ундаги биз учун энг муҳим факторга эътиборингизни қаратаман. Айни дамда, FIFA рейтингидаги ўрнимизга. Жаҳон чемпионати саралаш босқичининг иккинчи даврасига қуръа ташлаш чоғида шу омил катта аҳамият касб этади. Ҳозир рейтингга кўра, биз биринчи саватчадан ўрин эгаллашни уддалай олганимиз йўқ. Ҳозир ОФКнинг биринчи саватчасида Япония, Эрон, Жанубий Корея, Австралия, Саудия Арабистони, Қатар, Ироқ, БАА, Уммон терма жамоалари ўрин эгаллаган. Биз эса улардан жуда кичик фарқ билан ортда қолган ҳолда, иккинчи саватчанинг биринчи ўрнида турибмиз.

Ушбу тафовутни имкон қадар тезроқ йўққа чиқаришимиз шарт. Сабаби, жорий йилнинг ноябрь ойида 2026 йилги жаҳон чемпионатининг иккинчи босқичига қуръа ташланади. 20 июль санасида FIFA ўзининг янгиланган рейтингини эълон қилади. Унда юқорироққа кўтарилиш учун яқинлашиб келаётган турнирда имкон қадар яхши иштирок этишимиз шарт. Уммон ёки БААни қувиб ўтиб, ноябрь ойидаги ЖЧ саралаш қуръасида биринчи саватчадан ўрин эгаллаш учун ҳам бу жуда муҳим. Соддароқ қилиб айтсак, 2026 йилда бўладиган мундиал учун ҳаракат айнан “CAFA Nation's Cup"дан бошланади.

Хўш, мусобақадаги ўйинлар рейтинг балларини қандай тақдим этади, деган савол пайдо бўлиши мумкин. Қисқача тушунтириб ўтаман. Июнь ойи учун FIFA икки кунни ажратган. Мусобақадаги илк ўйинимиз 11 июнь санасида бўлишини ҳисобга олсак, унга берилиши керак бўлган балларнинг тенг ярми берилади. Сабаби, Уммон билан баҳс FIFA кунлари доирасидан ташқарида ўтказилмоқда. Гуруҳдаги қолган икки ўйинимиз учун FIFA рейтинг балларини тўлиқ тақдим этади.

Агар гуруҳдан чиқсак (катта эҳтимол бу ишни уддалаймиз) финал ёки 3-ўрин учун баҳсдаги ғалабага ҳам биринчи ўйинда бўлгани каби кўзда тутилган балларнинг тенг ярми берилади. Сабаби, юқорида таъкидланганимдек FIFA куни сифатида бу ойда 2 кун кўрсатилган. Демак, биз яқинлашиб келаётган мусобақадаги 4 ўйинда 4 ғалабага эришсак, Уммон ёки БААни рейтингда қувиб ўтиш имкониятини тақдим этиши мумкин. Бу ноябрь ойида бўладиган ЖЧ қуръасида Япония, Эрон, Жанубий Корея, Австралия, Саудия Арабистони, Қатар, Ироқ сингари Осиё грандлари билан эртароқ тўқнашувга чап бериш имкониятини беради.Хуллас, йигитлар...

Яҳёхўжа Улуғхўжаев