Жаҳонгир Ўрозов Арда Туран билан муносабати, нега ҳали ҳам чемпионатда майдонга тушмаётгани ва клубдаги келажаги хақида интервью берди

Ўтган йилнинг август ойида Туркиянинг “Эюпспор” клуби аъзосига айланган ҳамюртимиз Жаҳонгир Ўрозов ёдингиздами? 20 ёшли истеъдодли ҳимоячининг у ердаги фаолияти қандай кечяпти?

Хабарингиз бўлса, яқинда “Эюпспор” Туркия биринчи дивизионида муддатидан олдин ўз олдига қўйилган вазифани бажарган ҳолда Суперлига йўлланмасини қўлга киритди. Бу албатта бош мураббий Арда Туран учун ҳам катта ютуқ. Лекин ҳозирча ҳамюртимиз унинг қўли остида Туркия чемпионатида дебютини ўтказгани йўқ. Фақат Кубок учрашувида майдонга тушгани ёдимизда.

Куни кеча Sports.uz журналисти футболчимиз билан боғланди.

- Аввало, Суперлига йўлланмаси қўлга киритилгани билан табриклайман. Вазифа бажарилди. Бу ҳақида нима дея оласиз? Таассуротлар...

- Табрик учун раҳмат. Мавсум бошидаёқ жамоа олдига Суперлигага чиқиш вазифаси қўйилганди. Ушбу вазифа уддаланди. Албатта, таассуротлар яхши.

- Бош мураббий Арда Туран билан муносабатингиз қандай? У сизга қанчалик ишонч билдиряпти?

- Мураббий билан муносабатим яхши. Албатта, ишонч билдиради. Ҳар бир футболчида муҳитга мослашиш вақт талаб қилади.

- Клуб билан келажагингизни қандай кўряпсиз?

- Чемпионат ўйинида ҳали майдонга тушмадим. Кубок учрашувларида майдонга тушдим. Жамоада рақобат жуда кучли. Худо хоҳласа, рақобатни енгиб ўтиб, ўз ўрнимни топаман.

- Туркия чемпионатида сизга ёққан ва ёқмаган жиҳатлари нимада бўлди?

- Ёқмаган жиҳати бор дея олмайман. Ташкилотчилик аъло даражада. Ҳар бир ходим ўз ишига жиддий ёндашади, ёққан томони шу.

- Жамоада яқин дўстингиз ким?

- Дўстим деб алоҳида ҳеч кимни ажратиб кўрсата олмайман. Жамоада ҳамма бир-бири билан ахил.

- Ўзингиз айтиб ўтганингиздек, ҳали Туркия чемпионатида дебютингизни ўтказмадингиз. Бу нима билан боғлиқ: рақобат кучлими ёки бошқа сабаби борми?

- Албатта, рақобат. Лекин ҳали ёшман. Ўзимга ишонаман, рақобатни енгиб ўтаман. Лекин бир нарса бор, тўғрисини айтиш лозим. Бу ерда ҳам ўзимизга ўхшаш жойи шуки, мураббий ўзининг футболчисини ўйнатяпти, деса ҳам бўлади. Чунки кўп нарсани кўрдим ва амин бўлдим.

- Хизматингизга бошқа клублардан таклифлар борми?

- Бор, албатта. Осиёдан кўплаб клублар қизиқиш билдиришяпти. Мен футбол ҳақида ўйлашим керак. Саволга жавобни агентим, менежерим Шахриёр акадан сўраганингиз яхши бўларди.

Шуҳратбек Жўраев.