Италия афсоналари Шомуродовни нега “поддержка” қиляпти?
- 16-март 2025, 11:02
- Ali Ahmadxo’jayev
- 0
- Футбол
“Рома” футболчилари Европа лигасида Бильбоанинг “Атлетик” клубини енгиб ўтолмаганидан кейин римликлар жорий мавсум охиригача фақат бир мақсад – А Серия мусобақа жадвалида Европа кубокларига йўлланма берадиган ўринлар учун курашидан бўляпти.
Ҳозирча, Клаудио Раньери шогирдлари еттинчи поғонага кўтарилиб олган ва халқаро мусобақаларга йўл очадиган кучли олтиликни якунлаб турган “Болонья”дан тўрт очко ортда қоляпти. Европа Чемпионлар лигасига йўлланма берадиган тўртинчи ўринда бораётган “Ювентус” билан ўртадаги фарқ олти очкони ташкил қиляпти.
Шу боис, 16 март куни “Олимпико” стадионида “Кальяри”га қарши ўтказиладиган учрашувда ғалаба қозониш “Рома” футболчилари учун сув ва ҳаводек зарур.
Бўлажак беллашув бош мураббий Клаудио Раньери ва ҳужумчи Элдор Шомуродов учун алоҳида аҳамият касб этади. Чунки улар ўтган мавсумни “Кальяри”да ўтказиб, сардинияликларнинг юқори дивизиондаги ўрнини сақлаб қолишига катта ҳисса қўшган эди.
Италия футболида афсона даражасига кўтарилган собиқ футболчилар бўлажак беллашувга муносабат билдириб, Клаудио Раньери олдинги чизиқда ўзбек футболчисига ишонч билдириши лозимлигини таъкидламоқда.
Sports.uz портали мутахассисларнинг фикр-мулоҳазаларини ўзбекистонлик футбол ишқибозлари эътиборига ҳавола қилади.
Анжело Ди Ливио, “Рома”, “Ювентус”, “Фиорентина” ва Италия терма жамоаси афсонавий футболчиси:
Гапни Бильбаодаги нокаутли ўйиндан бошлаш керак. Мағлубиятда Матс Хуммельс айбдор, албатта. У аввал тўпни йўқотиб, кейин қўполлик ишлатган вазиятда Ндика ёки Свиларга пас бериши мумин эди. Лекин умуман нотўғри қарорга келди.
Клаудио Раньерининг ўша учрашувга танлаган таркиби менда ишонч уйғата олмади. Матиас Суле қарши ҳужумга тўғри келмайди, бу вазиятда бизга қўл-оёғи чаққон Салемакерс ва Эл-Шаарави керак эди.
Бу даражадаги баҳсга ҳатто Пизиллини ҳам тушурмаслик керак.
Ҳозир “Рома”нинг асосий ҳужумчиси Элдор Шомуродов. Агар “Рома” сафида Элдор Шомуродов ўйнаса жамоа ижобий натижага эришяпти ва очко оляпти. “Кальяри” билан бўладиган навбатдаги учрашувда Элдор майдонга тушса, кўзланган очко олинади.
Шунга қарамай, Артём Довбикдан воз кечиб бўлмайди. Бу футболчида муваффақиятга эришиш учун барча сифат етарли. Футболда айрим ўйинчилар янги жамоага ўтганидан кейин қийинчиликка дуч келиши бор нарса.
Чиччо Грациани, Италия терма жамоаси сафида 1982 йилги жаҳон чемпионати ғолиби:
“Рома” футболчилари Европа лигасида “Атлетик”га қарши иккита ўйинни тенг даражада ўтказа олмади. Деярли бутун учрашув давомида бир киши кам бўлиб ҳаракат қилиш жуда қийин. Хуммельснинг қизил карточкаси ортиқча бўлди.
“Рома” бу йил Европа Чемпионлар лигасига чиқа оладими?
Ўн ҳафта муқаддам “Рома”нинг ҳаёти жаҳаннамга айланиб кетган эди. Клаудио Раньери келганидан кейин улар тоза ҳавога чиқди. Агар захирангизда 30 очко бўлса ҳам, замонавий футболда вазият сиз учун ижобий ёки салбий томонга ўзгариб кетиши ҳеч гап эмас.
“Рома” футболчилари кайфиятини тушурмаслиги, аксинча, мавсум охиригача максимал очко олиш учун бор имкониятларини ишга солиб охиригача курашиши лозим.
Раньери ажойиб ишлаяпти ва мен Иван Юричнинг ўрнига у эртароқ олиб келинмаганидан афсусланаман.
Кейинги пайтда Элдор Шомуродов ўзининг чекланган имкониятлари билан ҳам жиддий кураш олиб бораётганини кўришимиз мумкин. Шунингдек, Конени ҳам ҳар қандай муҳим учрашувда майдонга тушириш шарт. Клаудио Раньери таркиб танлашда хато қилмаслиги лозим.
Эслатиб ўтамиз, “Рома” ва “Кальяри” ўртасидаги 29-тур учрашуви 16 март куни Тошкент вақти билан соат 19:00 да бошланади.